Qendra e Mjekësisë Familjare në Pejë është sulmuar me eksploziv në orët e hershme të mëngjesit të sotëm.
Policia e Kosovës ka treguar se gjithçka ka ndodhur rreth orës 03:50, ndërsa mjeti ndezës ka qenë i improvizuar, shkruan InLajmi.
Pas kësaj, është dëgjuar një shpërthim, ndërsa më vonë është vërejtur zjarr që kishte kapluar hyrjen e kësaj qendre.
Njoftimi i plotë i Policisë së Pejës:
Me datën 17 janar, 2020 rreth orës 03:50, persona të dyshuar, identiteti i të cilëve për momentin është i panjohur, kanë hedhur një mjet të improvizuar ndezës, në derën anësore (ndihmëse) të QKMF-së Pejë.
Sipas të dhënave nga punëtorët e qendrës, është dëgjuar një krismë (shpërthim), dhe menjëherë të njëjtit kanë dalë dhe kanë vërejtur zjarrin i cili kishte kapluar hyrjen e lartcekur, ku zjarrin kanë arritur ta shuajnë me anë të aparateve për fikjen e zjarrit.
Policia menjëherë ka shkuar në vendin e ngjarjes dhe ka ndërmarrë veprimet e nevojshme operative-hetimore.
Njësitet relevante të Drejtorisë Rajonale të Policisë në Pejë, janë duke punuar intensivisht në bashkëpunim të plotë me prokurorin e Shtetit, për të zbuluar të gjitha rrethanat e këtij rasti, si dhe për të identifikuar personat e dyshuar. /InLajmi
