Nënkryetari i LDK-së, Agim Veliu ka theksuar se angazhimi dhe veprimet e ditëve të fundit të VV-së nuk janë një përpjekje serioze për ndërtimin e institucioneve dhe arritjen e marrëveshjes me LDK-në për të bashkëqeverisë mbi bazën e fuqisë së votës.
Kryetari i LVV-së, Albin Kurti mbrëmë ia ka dërguar ofertën e fundit për bashkëqeverisje LDK-së, duke i propozuar që qeverisja e ardhshme të ketë 14 ministri, nga të cilat LDK do të përfitonte 6 ministri, LVV 5 dhe minoritetet 3 ministri.
Veliu ka thënë se përpjekja e LVV-së që LDK të shkëputet nga e kaluara e saj, është e dështuar dhe nuk duhet ta ndihmojë askush prej nesh.
Postimi i plotë:
Angazhimi dhe veprimet e ditëve të fundit të VV-së nuk janë një përpjekje serioze për ndërtimin e institucioneve dhe arritjen e marrëveshjes me LDK-në për të bashkëqeverisë mbi bazën e fuqisë së votës.
E tërë kjo është një përpjekje e VV-së për pushtet absolut dhe për ta nënshtruar e nënçmuar LDK-në, duke provuar t’ia nëpërkëmbin dinjitetin.
Madje, kërkesat e sotme të VV-së shkojnë edhe më larg, në synimin e tyre që LDK të shkëputet nga e kaluara e saj europiane dhe euroatlantike.
Nga cila e kaluar duan ata të shkëputemi? Mbase duan që të distancohemi edhe nga rugovizmi.
Kjo përpjekje e tyre sigurisht që është e dështuar dhe nuk duhet ta ndihmojë askush prej nesh. /InLajmi/
