Ministri i Jashtëm serb, Ivica Daçiq ka thënë se prioriteti kombëtar i Serbisë këtë vit do të jetë lufta për ta ruajtur sovranitetin, integritetin territorial si dhe të parandalojë anëtarësimin e Kosovës në organizata të ndryshme ndërkombëtare.
Daçiq ka theksuar për gazetën serbe ‘Blic’, se Serbia është e gatshme të vazhdojë dialogun me Kosovën dhe shpreson që kjo të ndodhë këtë vit.
“Ne po punojmë shumë me të gjithë partnerët ndërkombëtarë për t’u kthyer sa më shpejt në një proces që do të sigurojë një zgjidhje kompromisi dhe afatgjate për Kosovën. Po e përsëris se Serbia nuk është vetëm në këtë proces, nuk varet nga ne dhe gatishmëria jonë e qartë për të biseduar”, është shprehur ministri serb.
Ai shtoi se përkundër angazhimit dhe konstruktivitetit maksimal, Serbia nuk ishte e kënaqur me mbarëvajtjen e procesit vitin e kaluar sepse dialogu nuk vazhdoi për shkak të refuzimit të Kosovës për ta hequr taksën ndaj mallrave serbe.
“Është e pakuptueshme se si kjo masë ka vazhduar për më shumë se një vit, megjithë kërkesat nga e gjithë bota për ta shfuqizuar atë. Shpresojmë që kjo të ndryshojë këtë vit, tarifat të hiqen sa më shpejtë të jetë e mundut në mënyrë që të vazhdohet dialogu për të cilin Serbia është e interesuar dhe e sheh si mënyrë të vetme për të arritur një zgjidhje kompromisi dhe afatgjate”, transmeton lajmi.net.
Po ashtu, ai vuri në dukje se deri tani 17 shtete kanë tërhequr njohjen e Kosovës dhe se ka më shumë anëtarë në Këshillin e Sigurimit që nuk e njohin Kosovën si shtet.
