Drejtori i të ashtuquajturës zyre për Kosovën në qeverinë serbe, Marko Gjuriq, ka thënë se figurat kryesore politike në Kosovë nuk janë të bashkuar siç ishin më parë.
Gjuriq potencoi se nuk i vjen mirë që ka mospajtime mes partive politike shqiptare në Kosovë sepse, pasi siç thotë ai, këto mospajtime po reflektojnë edhe tek serbët.
“Është me rëndësi që serbët të mblidhen rreth bllokut të vetëm monolit që është Lista Serbe. Se a do ta formojë qeverinë Kurti a Murti, kjo është e parëndësishme sepse të gjithë janë separatistë”, tha Gjuriqi, duke shtuar se Lista Serbe fitoi 10 nga 10 vendet e rezervuara për serbët në Kuvendin e Kosovës.
Sipas tij, faktin se shqiptarët më nuk janë të bashkuar e tregojnë edhe shifrat e lindjeve të bebeve: më 2001 në Kosovë lindën 60 mijë bebe, më 2014 32 mijë ndërsa më 2018 lindën 22 mijë bebe.
Në një bised për televizionin serb “TvPink”, Gjuriq tha se i vjen keq që jo të gjithë serbët i janë bashkuar Listës Serbe, transmeton lajmi.net.
Ndërsa, derisa ka folur për djegien e veturës së anëtarit të Listës Serbe, Slavko Simiq, Gjuriqi tha se ky është një lloj “terrorizmi e sulmi” me qëllim që të frikësojnë Simiqin i cili është “një nga njerëzit më energjetikë në institucionet e Kosovës”.
