Ish deputeti i Kuvendit të Kosovës, Milaim Zeka, ka thënë se Lëvizja Vetëvendosje dhe LDK nuk janë treguar aspak serioze gjatë negociatave mes tyre për krijimin e institucioneve.
“Kanalet e komunikimit kanë qenë anormale dhe premtimet dhe deklaratat e tyre kanë qenë sinjali më i mirë për ata që deshifrojnë deklarata të liderëve politikë. Mustafa në momentin që është përzier në këtë çorbë është ditur se do t’i vjen një erë e keqe. Vjosa Osmani është e vetmja që ka pasë mandat që ta zgjidhë problemin e krijimit të Qeverisë me Albin Kurtin”, ka thënë Zeka.
Ai ka thënë se Kurti mundet me marrë vendime pa e pyet VV-në, ndërsa Mustafa nuk e ka këtë.
“Struktura e LDK është e ndërtuar në atë mënyrë që duhet mbledhur një forum për të marrë vendime. Për mua bllokues në këto negociata është Isa Mustafa – humbës do të jetë Albin Kurti”.
“Mustafa është bllokues sepse matematikat e tij janë me një stad të veprimit të gjatë. Mustafa ta qet ndërskamcën në Prishtinë, ndërsa Albin Kurti e merr vesh kur rrëzohet në Tiranë. Kurti nuk e ka kuptuar se asnjë teori politike nuk mund të zbatohet në Kosovë”.
