Në qytetin e Gjakovës është duke vazhduar protesta kundër ardhjes së pelegrinëve serbë.
Qytetarë e familjarë të personave të vrarë e të zhdukur në luftën e fundit në Kosovë janë duke protestuar para Kishës ortodokse në Gjakovë, ku pritet të vijnë disa pelegrinë serb.
Këta qytetarë janë duke protestuar kundër ardhjes së këtyre pelegrinëve, për shkak të mos pranimit të fajësisë së Serbisë për krimet që ka bërë gjatë luftës në Kosovë, e veçanërisht në qytetin e Gjakovës.
Nystrete Kumnova, nga organizata “Thirrjet e nënave”, i ka bërë thirrje institucioneve ndërkombëtare që të dënojnë personat përgjegjës në Serbi për krimet që i kanë bërë në Kosovë, raporton lajmi.net.
“I bëjmë thirrje dhe apel institucioneve tona e ndërkombëtare që të mos na lënë në rrugë, është një mëkat i madh. I bëjmë apel që ta akuzojnë Serbinë, ti kthejnë trupat dhe të dënohen kriminelët e të marrin dënimin e duhur”, ka thënë ndër të tjera Kumnova.
