Profesori dhe njohësi i zhvillimeve politike, Milazim Krasniqi në një prononcim për InLajmi ka folur për ftesat që kreu i VV-së, Albin Kurti ka marrë nga Presidenti Hashim Thaçi i cili ka thënë se thirrja nga ky i fundit është brenda ligjit dhe rregullave por që refuzimi nga ana e Kurtit është e pakuptueshme.
Ai tutje ka thënë se justifikimi i tij se është jashtë Prishtinës është qesharake dhe se shpreson që në ftesën e dytë të kthejë përgjigjje pozitive në mënyrë që të marrë mandatin për formimin e qeverisë, shkruan InLajmi.
“Pritet që në ora 20:00 zoti Kurti t’i përgjigjet ftesës së Presidentit të shkojë dhe ta marrë mandatin për formimin e qeverisë, kjo do të ishte rruga ligjore, qeveria nuk mund të formohet në mal, por duhet të formohet qeveri brenda procedurave kushtetuese, ligjore dhe ftesa e presidentit faktikisht është brenda këtij kuadri ku i hapë rrugë qeverisë”, ka thënë Krasniqi.
Ai tutje ka shtuar për InLajmi se nëse Kurti nuk pranon as ftesën e dytë atëherë nuk ka vullnet e as gatishmëri për ta marrë mandatin që e ka fituar, sipas tij nëse do të ndodhte kjo do të ishte e pazakontë që një kandidat për kryeministër ta refuzojë mundësinë për të marrë këtë pozitë.
“Shpresojmë që kjo të mos ndodh dhe zoti Kurti do t’i përgjigjet ftesës që ta marr mandatin dhe të bëjë përpjekje për të krijuar një koalicion që mundëson zgjedhjen e tij si kryeministër sepse rrugën e ka të hapur dhe varet nga aftësia e tij e negocimit me partnerin për koalicion me LDK-në, rrugën e ka të hapur për t’u bërë kryeministër”, ka thënë Krasniqi./InLajmi/
