Gjilani tash e sa muaj po përballet me gjendjen e vështirë të furnizimit me ujë si pasojë e tharjes së Liqenit të Përlepnicës.
Për shkak të mungesës së ujësjellësit, në tetë shkolla të fshatrave të qytetit të Gjilanit, uji i puseve ka dalë të jetë i papijshëm.
Nënkryetari i Komunës së Gjilanit, Arbër Ismajli, për Gazetën Express ka thënë se gjendja në këto shkolla nuk është alarmante siç është raportuar në media.
Instituti Regjional i Shëndetit Publik në Gjilan ka bërë analizat e cilësisë së ujit në këto shkolla dhe sipas gjetjeve të tyre uji është i kontaminuar në aspektin bakteriologjik dhe kimik.
Në tetë shkollat e fshatrave Pogragjë, Lladovë, Ponesh, Bresalc, Mihir, Llashticë, Dobërçan dhe Kmetoc ku është konstatuar uji i papijshëm vijojnë mësimin 1317 nxënës.
Nënkryetari i Komunës së Gjilanit, Arbër Ismajli, ka deklaruar se vetëm në tri shkolla është uji i papijshëm.
“Në Pogragjë, Miresh dhe Myhyr analizat bakteriologjike dhe kimike nuk kanë lejuar që uji të jetë i pijshëm. Me këtë rast kemi ndërmarrë veprimet e nevojshme dhe është bërë klorizimi i ujit në këto shkolla, ku pas kryerjes së këtyre veprimeve do ti marrim edhe njëherë mostrat e ujit për të parë edhe njëherë gjendjen e cilësisë së ujit në këto shkolla”, ka thënë Ismajli.
Ai ka deklaruar se gjendja nuk është alarmante siç është raportuar në media.
“Gjendja nuk është alarmante sepse ne si komunë i kemi ndërmarrë gjitha veprimet e nevojshme për sanimin e gjendjes. Ndërsa në pesë shkollat e tjera të apostrofuara nga media, gjendja nuk ka qenë e keqe sepse dikund kanë dalë keq analizat kimike e dikund bakteriologjike”, ka deklaruar nënkryetari i Komunës së Gjilanit.
Ismajli tutje ka thënë se “pas analizave te bëra në këto pesë shkolla, Instituti Regjional i Shëndetit Publik ka rekomanduar që uji nuk është i dëmshëm”.
Nënkryetari i kësaj komune tha po ashtu se gjendja momentale me furnizimin me ujë është e rëndë.
“Gjendja është e rëndë, po ballafaqohemi me thatësira të mëdha, jemi në fazën e reduktimeve në gjithë qytetin dhe në fshatra që sadopak qytetarët të kenë ujë, janë disa burime si: Baja,Velekinca dhe Guri i Hoxhës që pavarësisht thatësisë ka grumbullim të ujit”
I pyetur se cili është plani konkret i Komunës karshi situatës së rëndë me ujin e pijes, Ismajli tha se tre puse të reja do t’i kyçin në sistemin e ujësjellësit.
“Jemi duke punuar në zgjidhjen emergjente për përmirësim të ujit të pijshëm, kemi aktivizuar tre puset që gjenden në kazermën e FSK-së në Gjilan dhe gjithashtu kemi filluar hapjen e puseve të reja në Fidanishte. Puset tek FSK-ja janë kyçur në sistemin e ujësjellësit dhe shumë shpejt priten edhe kyçjet nga Fidanishtja”.
Ismajli tha se Banka Botërore i ka ndarë 10 milionë dollarë për gjendjen e ujit në qytet, dhe me formimin e qeverisë së re do të fillojnë zgjidhjen afatgjate për këtë problem.
“Banka botërore ka ndarë 10 milionë dollarë për ujërat në Gjilan dhe besoj që me formimin e qeverisë, do të fillojmë procedurat për zgjidhjen e problemit afatgjatë të ujit në Komunën e Gjilanit”, u shpreh Ismajli.
