Në muajt e fundit, Agjencia e Ushqimit dhe Veterinarisë ka asgjësuar tonelata të shumta të mishit, sepse ky produkt ushqimor nuk i ka plotësuar kushtet për treg.
Kjo po shihet si shqetësuese për sigurinë e ushqimeve të cilat i konsumojnë qytetarët e Kosovës, raporton KTV.
E se ka mungesë në sigurinë e zinxhirit ushqimor nga AUV-i, e ka konstatuar edhe një raport i Zyrës Kombëtare të Auditimit.
“Auditimi ka nxjerrë në pah se Agjencia e Ushqimit dhe Veterinarisë ende nuk e ka plotësisht funksional sistemin e sigurisë në tërë zinxhirin ushqimor. Vlerësimi i sigurisë në ushqim përmes listave të kontrollit, nuk i përfshin të gjitha Parimet e Analizës së Rrezikut dhe Pikave të Kontrollit Kritik, i njohur si HACCP. Për më tepër, as Laboratori i Ushqimit dhe Veterinarisë nuk është i akredituar për të gjitha analizat e nevojshme për siguri në ushqim”, ka thënë Zyra Kombëtare e Auditimit.
Mes të tjerash, Auditori ka gjetur edhe moskoordinim të autoriteteve qendrore dhe atyre lokale. Kjo, pasi inspektorët komunalë nuk janë transferuar në AUV.
Por, këto mangësi, sipas drejtorit të Drejtorisë së Shëndetit Publik, në AUV, Flamur Kadriu, nuk bëjnë që produktet ushqimore të jenë të pasigurta.
Sipas tij, një numër i këtyre gjetjeve janë adresuar edhe nga vetë Agjencia dhe një pjesë e tyre janë mangësi teknike, shkruan Koha.net.
Auditori i Përgjithshëm e ka hartuar raportin për vitin 2018 dhe gjashtëmujorin e parë të vitit 2019. Studimin e ka kryer pikërisht me produkte të mishit dhe grurit.
