Këngëtarja e bukur e baladave dhe këngëve qytetare, këtë vit ka qenë më aktive se asnjëherë në muzikë. Fillimisht me një këngë plot ritëm, dhe më pas me një baladë mbresëlënëse dedikuar nënës, është kjo Yllka e cila nuk i tha “Jo” intervistës për Gazetën InLajmi , duke rrëfyer më të rejat në karrierën e saj.
Përveç se një këngëtare, ajo ka edhe një profesion tjetër të cilin e praktikon në përditshmëri. Joshëse dhe me stil, e rrethuar me plot dashuri nga bashkëshorti dhe familjarët, me pak fjalë, e përmbushur në çdo aspekt në jetën e saj private, është kjo Yllka Kuqi, shkruan InLajmi.
InLajmi: Keni qenë shumë aktive kohëve të fundit me projekte muzikore. Na trego pak sa ke ndjerë lodhje gjatë gjithë kësaj kohe që vazhdimisht ke qenë e angazhuar?
Yllka Kuqi: Po e vërtetë që jam përkushtuar më shumë rreth muzikës, dhe krahas lodhjes që është normale, kam ndjerë edhe shumë kënaqësi, dhe kjo sigurisht që e mund lodhjen pastaj.
InLajmi: Gjithnjë e bukur në paraqitjet tuaja, por kohëve të fundit ka edhe nga ata që iu kanë ‘gjykuar’ pak për ekstravagancën. Sa ju pengon kjo pjesë?
Yllka Kuqi: Ekstravaganca është pjesë e artit dhe besoj tregon edhe guximin që artistët kanë në përgjithësi. Ekstravagancë nuk d.m.th “keq ose mirë”, por diçka jo e zakonshme dhe e guximshme, gjë që mua më pëlqen ta bëj ndonjëherë. E gjykimi është pjesë e jetës, ne jemi njerëz dhe jemi të mësuar të gjykojmë, diçka na pëlqen e diçka jo, varet nga momenti, shija, disponimi etj. Përpiqem të mos i gjykoj ata që gjykojnë.
InLajmi: Vite në skenë me shumë projekte, çka e cilësoni si një ndër momentet më të suksesshme në karrierën tuaj?
Yllka Kuqi: Ka pas shumë momente të tilla. Por periudha më e suksesshme besoj janë tri vitet e fundit në përgjithësi.
InLajmi: Ndërkohë jeni e martuar dhe jetoni në Gjakovë. Përveç muzikës dimë që jeni edhe psikologe. Si e gjenë Yllka veten në profesionin tjetër dhe a e ushtron me po aq kënaqësi sa muzikën?
Yllka Kuqi: E ushtroj me shumë kënaqësi dhe kjo është arsyeja që nuk kam hequr dorë nga asnjëra. Shkollimi më ka dhënë avantazhe të shumta në jetë dhe më ka përmbush personalisht, andaj e konsideroj si pasuri të madhe që e kam.
InLajmi: Çfarë mendimi keni për festivalet e sotme, dhe a është ‘shuar’ Yllka e dikurshme e cila merrte pjesë në festivale dhe rrëmbente gjithmonë çmime?
Yllka Kuqi: E kam përmbush veten më duket shumë më herët në fillimet e mia në festivale dhe kjo shpjegon ndoshta mospjesëmarrjen kohëve të fundit.
InLajmi : Po tregun muzikor si e vlerësoni, cilat janë sipas jush mangësitë me të cilat po përballet estrada?
Yllka Kuqi: Në fakt ka aq shumë llojllojshmëri e prurje në muzikën shqiptare sa që nuk po më bien ndër mend mangësitë. Ka vend për të gjithë, dhe tregu është mjaft i hapur.
InLajmi : Cili ka qenë momenti i pa harruar për këtë vit ?
Yllka Kuqi: Kam pasur shumë, mirëpo njëri moment që nuk do ta harroj ka qenë ku pas shumë viteve kuptova lajmin që unë po bëhesha nënë. Me besoni mezi po pres te vijë në jetë bebushi im ku akoma pa e parë po e ndjej si gjysmën e jetës sime.
InLajmi: Cilat janë planet për vitin 2020?
Yllka Kuqi: T’ju sjell këngë të mira, kualitative si dhe për herë të parë për ju InLajmi po e zbuloj se vitin që po vjen do te kem një baladë të punuar nga mjeshter i madh siç është Armend Rexhepagiqi, ku me teper nuk do te kisha zbuluar. Intervisten e realizoi: Sajmir Morina / InLajmi/
