Ministri në detyrë i Punëve të Jashtme të Kosovës, Behgjet Pacolli, është shprehur kundër iniciativës për shkarkimin e presidentit amerikan Donald Trump.
Përmes një postimi në Twitter, Pacolli shkroi se Kosova ka besim në të e se ai do të jetë kyç në marrëveshjen historike me Serbinë.
“Akuza kundër presidentit Trump nuk mendoj se është diçka që Amerika dhe bota ka nevojë. Kosova ka besim të madh në Presidentin Trump, që do të jetë vendimtar në marrëveshjen historike me Serbinë. Pres një fund pozitiv”, ka shkruar ai në Twitter.
Në postimin e tij, Pacolli ka përdorur fotografinë nga video e famshme ku kishte shtrënguar duart kalimthi me Trumpin e që në Facebook e kishte prezantuar si takim, shkruan lajmi.net.
Në këtë video ishte dëgjuar një zyrtar që nxiste Pacollin “t’ia jipte dorën Trumpit”.
