Komuna e Gjakovës është qyteti i parë që është vizituar nga Ambasadori i Mbretërisë së Bashkuar në Kosovë, Nicholas Abott, i cili është pritur nga kryetari i kësaj komunë Ardian Gjini, shkruan InLajmi.
Kjo është bërë e ditur përmes një postimi në Facebook në faqen e kësaj komune, ku gjatë takimit kanë biseduar për mundësitë e zhvillimit të Gjakovës e Kosovës.
“Jam shumë i lumtur që jam sot në Gjakovë. Kjo është vizita ime e parë zyrtare në Kosovë, pas Prishtinës. Me kryetarin, biseduam për të ardhmen e Gjakovës dhe Kosovës në përgjithësi” u shpreh ambasadori Abbott pas takimit.
“Është kënaqësi e madhe ta kemi ambasadorin e Mbretërisë së Bashkuar në Gjakovë. Kemi marrëdhënie shumëvjeqare me Britaninë e Madhe, e cila ka qenë mbështetëse e madhe e Kosovës edhe në kohët më të vështira por edhe tash” deklaroi kryetari Gjini.
Pas këtij takimi, përmes një ceremonie solemne, Ambasadori Abbott është shpallur mik nderi i Gjimnazit “Hajdar Dushi” në Gjakovë./InLajmi/
