Presidenti i Serbisë, Aleksandar Vuçiq i është kundërpërgjigjur deklaratave të kryeministri në detyrë të Kosovës, Ramush Haradinajt.
Haradinaj, në një akademi përkujtimore të organizuar dje në 21 vjetorin e rënies së komandantit të Brigadës 113, Mujë Krasniqi dhe 40 dëshmorëve të kombit, ka thënë se Aleksandar Vuçiqi dhe kolegët e tij nuk mund ta mohojnë që djemtë e UÇK-së i kanë përzënë ata nga Kosova.
E për këto deklarata të Haradinajt ka reaguar sot, presidenti Serb, Aleksandar Vuçiq.
Ai tha se e ka kuptuar porosinë e Haradinaj, i cili tha se UÇK-ja e ka dëbuar ushtrinë serbe nga Kosova, sikurse edhe Albin Kurtin, kur thotë se nuk do t’i japë territor Serbisë si ngushëllim për Kosovën e humbur.
“Janë njerëz seriozë dhe porosi serioze, i kemi pranuar dhe kuptuar. Ata e dinë se cilat janë interesat e popullit të vet, dhe ne i dimë interesat e popullit tonë. Interesi ynë parësor është paqja dhe ruajtja e paqes”, tha Vuçiq.
Vuçiq tutje ka thënë se shqiptarët mendojnë se janë shumë të fuqishëm e serbët të dobët, duke shtuar se është më mirë që serbët të jenë të përgjegjshëm dhe seriozë, sepse e dinë se cilat janë interesat e tyre nacionale dhe shtetërore, shkruan Reporteri.
“Nuk më shkon mendja t’i ofendoj. Puna jonë është të ruajmë paqen dhe të ndihmojmë popullin tonë të qëndrojë, të ketë sa më pak gjykime për vepra verbale – më mirë të më gjykojnë mua sesa popullin tonë. Mua gjithmonë më interesojnë veprat e jo fjalët”, tha Vuçiqi.
