Deputeti i LDK-së, Lumir Abdixhiku, ka kritikuar publicistin Kim Mehmeti dhe Donika Eminin e Civikosit për deklaratat e tyre ndaj LDK-së dhe kryetarit të saj Isa Mustafa.
I pari kishte thënë se “profesorët e LDK-së njërën dorë ta fusin në xhep, e me tjetrën ta ledhatojnë kokën”, ndërsa Emini kishte thënë se “Mustafa po dëshiron të garantohet tash si president, ndërsa nuk do të dihet a do të jetë gjallë pas dy vjetëve, për shkak të problemeve shëndetësore”.
Të dy deklaratat ishin dhënë në Rubikon të KTV-së, aty ku Abdixhiku i quajti shprehje urrejtëse dhe johumane.
“Interferimet e jashtme i kam parë shpesh, për shembull kur një publicist si Kim Mehmeti thotë profesorët e LDK-së në njërën anë të fusin dorën në xhep e me tjetrën të ledhatojnë ai s’jep mendim, por shpreh urrejtje ndaj një subjekti politik. Apo një aktiviste e shoqërisë civile, thotë se zoti Mustafa s’mund të bëhet president sepse s’dimë a është gjallë pas dy vjetëve. Ajo shfaq urrejtje ndaj njerëzores. Si po e dika zonja e nderuar se kush sa jeton e kur vdes, është jo humane, është shqetësuese që shoqëria civile nuk reagon, është mungesë respekti ndaj dikujt që ishte kryeministër, ndaj një familjari, ndaj një kryetari të qytetit”, ka thënë Abdixhiku.
Ai ka kritikuar edhe “analistët politikë që kurdisen me para”.
Abdixhiku: Nëse s’ka marrëveshje me VV-në për shtatë ditë, humb shpresa për koalicion
Lumir Abdixhiku i LDK-së ka thënë se nëse nuk arrihet marrëveshja për koalicion qeverisës mes Vetëvendosjes e LDK-së brenda shtatë ditëve të ardhshme, do të humbin shpresat për marrëveshje.
Sipas tij, kjo sepse me kalimin e kohës do të krijohet distancë që s’do t’i shërbente një marrëveshje potenciale mes partive.
“Besoj që afati kushtetues i rregullt nis më 24 dhjetor. Pra i kemi dy javë për të arritur marrëveshjen. Për të qenë i drejtpërdrejtë, beosj që brenda javës ose duhet të arrihet marrëveshje ose s’ka shpresë për marrëveshje. Sepse koha lë hapësirë për interferim të të tjerëve e të krijohet distancë”, ka thënë ai duke shtuar se është mirë që takimet do të jenë më intensive.
Ai ka thënë se po që se VV-ja do të pajtohej me LDK-në për pikën e presidentit tash, marrëveshja tashmë do të arrihej.
Abdixhiku: Nëse VV-ja e çon vendin në zgjedhje nuk mund të ketë koalicion me LDK-në, mundet me PDK-në
Nëse dështon arritja e marrëveshjes mes Vetëvendosjes dhe LDK-së për krijimin e qeverisë dhe vendi shkon në zgjedhje të reja, sipas Lumir Abdixhikut të LDK-së, nuk mund të ketë më pas bashkëpunim mes dy partive.
Ai ka thënë se nëse Vetëvendosje e çon vendin në zgjedhje, do t’i duhet të marrë partnerë të tjerë nëse fiton zgjedhjet, përfshirë PDK-në, për të cilën është deklaruar vazhdimisht se nuk pranon bashkëpunim me të.
“LDK-ja po provon çdo ditë për të bërë marrëveshje, madje duke duruar edhe të themi gjuetinë publike mirëpo LDK-ja as nuk i shkakton zgjedhjet por as nuk i pengon. Pas zgjedhjeve, nëse s’ka marrëveshje tash, unë nuk shoh marrëveshje LDK – VV në të ardhmen dhe Vetëvendosje duhet të gjejë një parti tjetër duke përfshirë këtu që të bëjë koalicion me PDK-në”, ka thënë Abdixhiku. “Në zgjedhjet e ardhshme, unë besoj se do të ketë koalicion parazgjedhor. S’ka logjikë [koalicion mes LVV-LDK] nëse nuk kanë arritur të bëjnë marrëveshje për krijim të qeverisë. Po e them kështu, ky është momenti i fundit që të merremi vesh”.
Abdixhiku: Çështja e presidentit ka qenë pjesë e marrëveshjes paraprake me VV-në
Sipas deputetit të LDK-së Lumir Abdixhiku, çështja e presidentit të vendit ka qenë pjesë e marrëveshjes paraprake me Vetëvendosjen.
Ai ka thënë se në një marrëveshje para zgjedhjeve të 6 tetorit, partitë ishin marrë vesh që çështja e pozitave politike do të diskutohej brenda partnerëve.
“Ka qenë pjesë e një marrëveshje paraprake, draft-marrëveshje ku është thënë se çështjet e pozitave politike do të diskutohen brenda partnerëve. Nuk është diskutuar në detaje sepse as marrëveshja s’ka qenë voluminoze siç është tani sepse nuk e dinim se si do të dalim prej zgjedhjeve. Ka një draft por nuk është diskutuar, ka qenë kapitull, pikë e një dokumenti”, ka thënë ai.
Abdixhiku ka kritikuar Vetëvendosjen duke thënë se “në momentin që ka mosmarrëveshje, nuk duhet të zmadhohen ato”.
“Ose je naiv për të shkatërruar marrëveshjen, ose je i porositur për ta shkatërruar marrëveshjen”, ka thënë ai.
Abdixhiku: Sikur LDK-ja të dilte e para tashmë do të kishim qeveri e Kurtin president të ardhshëm
Sipas Lumir Abdixhikut të LDK-së, sikur kjo parti të dilte e para në zgjedhjet e 6 tetorit, tashmë do të ishte arritur marrëveshja për koalicion qeverisës me Vetëvendosjen.
Duke folur për zgjatjen e diskutimeve mes dy partive për formimin e qeverisë, Abdixhiku ka thënë se nëse LDK-ja do të ishte në vendin e VV-së në rezultatet e zgjedhjeve, partia e Albin Kurtit do të merrte dy pozitat tjera kryesore, pos asaj të kryeministrit.
“Tashmë do ta kishim qeverinë me VV-në 24 orë pas certifikimit. Me siguri Kurti do të ishte presidenti i ardhshëm, e një anëtar i VV-së kryetar i Kuvendit”, ka thënë ai në Rubikon.
Abdixhiku thotë se Vetëvendosje ka shkelur marrëveshjen paraprake me LDK-në
Deputeti i LDK-së, Lumir Abdixhiku, ka thënë se Vetëvendosje ka shkelur njërën nga marrëveshjet e arritura në ditën e parë të diskutimeve për arritjen e koalicionit qeverisës.
Sipas tij, dy partitë ishin marrë vesh që të mos bëhet asgjë publike derisa të arrihet marrëveshja finale. Në Rubikon të KTV-së, Abdixhiku ka thënë se kjo është shkelur nga Vetëvendosje duke nxjerrë diskutimet nga tavolina e liderëve në publik.
“Kur takohen dy liderë, dhe vetëm ata dy në takim, nuk i takon të tretit të interpretojë detajet e takimit. Nëse vendosin ta bëjnë publike substancën e takimit, mund ta bëjnë. Edhe po të më takonte të interpretoja do të thosha dy marrëveshje që kemi, që asgjë s’është e marrë vesh derisa gjithçka të merret vesh dhe e dyta që është shkelur që substanca e diskutimeve të mos bëhet publike derisa të ketë marrëveshje finale. Gjatë javës së kaluar ka pasur zyrtarë të VV-së që diskutimet nga tavolina e liderëve i kanë bartur në publik. Kjo është mes naivitetit dhe qëllimit jo të mirë për të arritur marrëveshje, sepse tjetër shpjegim s’mund të gjej, por kur e vendos diskutimin mes palëve me mirëbesim, në publik e dërgon te militantët”, ka thënë ai, shkruan Koha.net.
“Atë që e kemi ndërtuar për dy vjet gjatë opozitarizmit të përbashkët, kur parandaluam qeverisjen më të keqe që ka pasur Kosova e të marrim iniciativa të mira, mirëbesimin me përafrimin e dy palëve, dhe mirëbesimin e ndërtuar gjatë takimeve përafruese, kam përshtypje se e lëkundim po që se e vendosim debatin në publik. Kjo e ul nivelin e mirëbesimit. Dua të besoj se kjo është e shkuar dhe se takimi i sotëm shërben për rindërtimin e mirëbesimit dhe kthejnë nivelin e beismit në nivel optimal për të ndërtuar qeverisje të gjatë”, ka thënë ai për takimin e sotëm të krerëve të partive, Albin Kurtit të VV-së e Isa Mustafës së LDK-së ku u tha se u pajtuan për të vazhduar bisedimet.