Ministri i Jashtëm në detyrë, Behgjet Pacolli ka mbajtur sot një konferencë për medie.
Sot në një konferencë për shtyp Pacolli ka paraqitur koleksionin e mbi 10 mijë dokumenteve që do ti dorëzohen Prokurorit special të Kosovës për krimet e luftës të kryera dhe gjenocidin nga Serbia në Kosovë.
“Ne asnjëherë nuk duhet të harrojmë mizoritë e së kaluarës. Ne ia kemi borxh viktimave të këtyre krimeve kundër njerëzimit. Ne ia kemi borxh edhe vetvetes: ne mund të ndërtojmë një të ardhme më të mirë nëse ndriçojmë ditët e errëta të së kaluarës. Është një detyrim moral ndaj njerëzimit”, shkroi Pacolli.
Pacolli tha se detyra historike është të dokumentohen torturat, vrasjet, përdhunimet, dëbimet me forcë dhe krimet e tjera të luftës të kryera nga forcat e qeverisë serbe dhe jugosllave kundër shqiptarëve gjatë luftës së vitit 1998-1999. Kosova duhet të tregoj fushatën e koordinuar dhe sistematike për të terrorizuar, vrarë dhe dëbuar shqiptarët e Kosovës që u organizua nga nivelet më të larta të qeverive serbe dhe jugosllave në pushtet në atë kohë, që kishte rezultuar në shpërnguljen më të madhe të popullsisë në Evropë që nga Lufta e Dytë Botërore.
Tutje Pacolli tha se prokurorët, policia, gazetarët dhe studiuesit e të drejtave të njeriut kanë hetuar, dokumentuar dhe raportuar përgjegjsinë individuale të shkeljeve të të drejtave të njeriut në Kosovë gjatë luftës. Këto dokumente janë përdorur nga Tribunali i Hagës në disa raste të lidhura me Kosovën dhe disa jo.
Ato tregojnë thellësinë e krimeve të luftës të kryera në Kosovë.
Ministtri në detyrë tregon se kanë dorëzuar tek Prokuroria Kosovës mbi 10 mijë dokumente dhe fakte që dëshmojnë përgjegjësinë politike dhe individuale të krimeve të luftës të kryera në Kosovë nga Serbia
Sipas Pacollit kjo është mënyra e vetme që Kosova ta mbajë të vërtetën gjallë dhe të sjell drejtësi. /InLajmi
