Përkundër premtimeve të njëpasnjëshmeve të dy partive VV dhe LDK, e po ashtu edhe deklaratës së të parit të VV-së, Albin Kurti se marrëveshja për bashkëqeverisje mes këtyre dy partive do të formalizohej 72 orë pas certifikimit të zgjedhjeve, nuk ka ende asgjë konkrete në këtë drejtim.
Deklaratat nga përfaqësues të të dy palëve tregojnë që ka shumë probleme deri në arritjen e marrëveshjes, të reduktuara kryesisht në ndarje postesh.
“Unë edhe më herët e kam thënë që problemi më i madh është një trashëgimi raportesh mosbesuese ndërmjet LDK-së dhe Vetëvendosjes. Pra problemi kryesor është kalimi i këtij mosbesimi të së kaluarës e cila siç duket ende nuk është tejkaluar . Ata kanë deklaruar që e kanë harmonizuar programin, por nuk është e qartë së paku për publikun e gjerë se cili është programi i ardhshëm qeverisës dhe në bazë të saj mund të shihet se nga anon ai program, a anon nga e djathta e LDK-së apo nga e majta e Vetëvendosjes. Ndërsa reduktimi në çështje postesh mendoj që është një banalizim i gjithë këtij procesi negociator sepse postet nuk duhet të duhej të paraqisnin problem, problemin më të madh e ka mirëbesimi dhe programi i qartë qeverisës”, thekson profesori universitar, shkrimtari e publicisti Milazim Krasniqi.
Është pikërisht posti i presidentit, i synuar nga ana e LDK-së, të cilin Mustafa dëshiron ta rezervoj për vete, njëra ndër problematikat kryesore, të cilat po stagnojnë arritjen e marrëveshjes.
Profesor Krasniqi thekson se titullin e presidentit e meriton ai që i fiton votat në një cikël normal të zgjedhjes së presidentit. Ndërsa të parin e LDK-së, i cili ka përvjelur mëngët në synim të këtij posti, Krasniqi e vlerëson si personalitet me kompetencë për të udhëhequr nisur nga fakti se ai ka udhëhequr qeverinë edhe më parë e po ashtu udhëheq njërën nga partitë më të mëdha në vend.
“Unë mendoj që një pjesë e mediave janë të padrejta ndaj tij , qoftë për gjendjen e tij shëndetësore ose për kompetencën e tij sepse në këtë aspekt nuk mund të vlerësohet kandidatura e dikujt, ajo vlerësohet vetëm nga aspekti i kompetencave se a i ka numrat e nevojshëm për të marë këtë post”, thekson Krasniqi për Gazetën Observer.
Dje, po ashtu u përmend edhe fakti që LDK ia ka vënë syrin Ministrisë së Punëve të Brendshme, gjë forcoi “bllokadën” mes dy partive, pasi asnjëra nuk tregohet e gatshme të heqë dorë nga kjo ministri.
“Në këtë aspekt Isa Mustafa dhe Lidhja Demokratike e Kosovës tregojnë menquri shumë të madhe sepse ata e dinë prirjen hakmarrëse dhe revanshiste të Vetëvendosjes dhe e dinë që nëse VV e mer këtë ministri atëherë mund të ketë probleme shumë më të mëdhaja në vend sepse mund të instalohet një logjikë policore e ngritjes së hetimeve dhe e ndjekjes së njerëzve dhe në këtë aspekt jam i bindur që LDK-ja ka absulitisht të drejtë që insiston që Ministria e Brendshme të jetë në duart e saj. Në rastin tjetër do të instalohej ideja e ndjejkeve policore, atëherë mund të kishte reagim nga grupet e tjera politike dhe vendi do të shkonte në një shkallë të re të polarizimeve politike”, thekson Krasniqi.
Sipas Krasniqit duhet të tregojë mençuri dhe të heq dorë nga ideja që ta kontrolloj policinë, pasi sipas tij, vetë eksponentët e Vetëvendosjes kanë disa ide dhe inate të vjetra me Policinë e Kosovës për shkak që kanë qenë të arrestuar dhe të keqtrajtuar nga policia, kështu që do të kërkonin ta vinin policinë nën kontrollë gjë që sipas Krasniqit do të kishte pasoja edhe më serioze./InLajmi
