Në moshën 83 vjeçare ka vdekur sot Zeqë Shehu, sekretar shumëvjeçar i Universitetit të Prishtinës dhe veprimtar i palëkundur i çështjes së lirisë së Kosovës.
Ai u lind në Junik më 1936, ku mbaroi shkollën fillore, ndërsa gjimnazin e ulët (tetëvjeçaren)në Gjakovë, sikundër edhe disa klasë të gjimnazit, kurse maturën në gjimnazin e Pejës.
Zeqa Fakultetin Juridik e kreu në Prishtinë në vitin 1966, kurse dy vjet më vonë zgjidhet sekretar i Bashkësisë së Fakulteteve dhe Shkollave të Larta të Kosovës në Prishtinë.
Në vitin 1970 zgjidhet sekretar i përgjithshëm i Universitetit të Prishtinës ku punoi deri në shtator të vitit 1983.
Me angazhimin profesional në hartimin e rregullativës normative të shkollimit të lartë në Kosovë, ai dha kontribut të veçantë, sikurse edhe në hartimin e Ligjit mbi Shkollimin e Lartë dhe të Statusit të parë të Universitetit të Prishtinës.
Më vonë ishte sekretar i Fakultetit të Arteve në Prishtinë.
Refuzoi t’i aplikojë ligjet antikushtetuese të Serbisë, për pasojë me u largua nga puna.
Zeqë Shehu, përveç të tjerash, ishte edhe deputet i Kuvendit të Kosovës në përbërjen legjislaturave të viteve të nëntëdhjeta.
Për punën dhe angazhimin e tij është laureat i shumë dekoratave dhe mirënjohjeve.
Me rastin e vdekjes së veprimtarit shumëvjeçar dhe aktivistit të dalluar të LDK-së, Zeqë Shehu, kryetari i LDK-së, Isa Mustafa dërgoi telegram ngushëllimi, transmeton Koha.net.
“Në emër të LDK-së ju shprehë ngushëllime të sinqerta. Zeqë Shehu në radhët e aktivistëve të LDK-së do të mbahet përherë në mend, si veprimtari i çështjes kombëtare në ditët e vështira të popullit dhe vendit tonë. Si LDK, ne do të jemi përherë mirënjohës për kontributin e Zeqë Shehut. Ngushëllime të gjithë familjarëve, miqve dhe kolegëve”, thuhet në telegramin e ngushëllimit.
