Sindikata e punëtorëve të QKUK-së është treguar zemërgjerë ndaj menaxhmentit të Qendrës Klinike Universitare të Kosovës.
Kjo sindikatë ka organizuar një mbrëmje muzikore për anëtarët e saj të cilët kanë participuar me nga 5 euro. Në këtë mbrëmje e cila është mbajtur në një nga restorantet e Prishtinës, kanë qenë të ftuar edhe menaxhmenti i QKUK-së, shkruan Gazeta Shneta.
Në disa fotografi që janë publikuar në rrjetet sociale, shihet se sindikalistët përveç vetes kanë qerasur edhe drejtorët dhe shefat e administratës së QKU-së. Në tavolinat e tyre shihen të ashtuquajturat ‘kofe me akuj’ dhe shishe të alkoolit ‘Jack Daniels’ të cilat paguhen mjaft shtrenjtë nëpër lokale.
Nga menaxhmenti i QKUK-së kanë marr pjesë drejtori i përgjithshëm Dr. Basri Sejdiu, shefi për financa Enver Gashi, shefi për kontraktimin e shërbimeve Dardan Parduzi, drejtori për infermieri Sami Tahiraj, ndërsa në tavolinë shihet edhe anesteziologu Rexhep Gjyliqi, etj.
Kjo sindikatë është kritikuar mjaft shumë nga anëtarët e saj, sidomos nga infermierët të cilët e kanë akuzuar për mospërfaqësim gjatë negociatave për koeficientin në Ligjin për Paga i cili pritet të zbatohet nga 1 dhjetori i këtij viti.
