Kërkohet shfuqizimi i vendimit për shtrenjtimin e sigurimeve
Vendimi i Bankës Qendrore të Kosovës për ngritjen e çmimeve 26% për sigurimin e automjeteve ka ngjallur reagime në Kosovë, me qytetarët të cilët shprehen se ky vendim është i padrejtë dhe i papërballueshëm.
Në lidhje me këtë vendim janë paralajmëruar edhe disa protesta para Bankës Qendrore të Kosovës, madje disa prej organizatorëve kanë thënë se ato do të vazhdojnë deri në tërheqjen e këtij vendimi.
Nesër është paralajmëruar të mbahet një protestë nga një grup në Facebook “Merakli të kerreve”, ndërkaq protesta tjetër është paralajmëruar për pasnesër nga “Speedomaniaks”.
Mirëpo, Banka Qendrore e Kosovës ka ftuar mediat një konferencë për media nga ora 11:00, ku temë e saj do të jetë pikërisht ngritja e çmimeve për sigurimin e automjeteve.
Këshilli për Mbrojtjen e të Drejtave e të Lirive të Njeriut e kundërshton rritjen e taksës për sigurim të automjeteve nga kompanitë e sigurimeve dhe përgjegjës kryesor për këtë e bën Bankën Qendrore e cila, sipas KLMDNj-së në vend ta luaj rolin e rregullatorit të këtyre kompanive po bëhet pjesë e zhvatjes aktive të buxhetit të qytetarëve të Kosovës, transmeton 21Media.
Ndryshe, BQK kishte marrë vendim për shtrenjtimin e sigurimeve më 1 nëntor, ndërsa në fuqi ka hyrë më 15 të këtij muaj.
