Kreu i Komunës së Drenasit Ramiz Lladrovci, ish-themeluesi i UÇK-së, të martën doli para Prokurorisë Speciale të Hagës në cilësinë e dëshmitarit. Ndonëse nuk u deklarua për medie, Lladrovci kishte thënë se do të shkojë në Hagë për ta mbrojtur luftën e drejtë e të pastër të UÇK-së.
Nënkryetari i OVL-së së UÇK-së, Nasim Haradinaj, ka bërë të ditur se aktualisht nuk ka ndonjë ftesë të re nga Prokuroria Speciale, mirëpo numri i të ftuarve që janë paraqitur në OVL ka kaluar shifrën prej 160.
“Aktualisht nuk kemi ndonjë njoftim për të ftuar të tjerë nga Specialja, por kjo gjë varet nga vullneti i tyre a duan të na njoftojnë ne si OVL ose jo. Shihet se është rritur fluksi, ka kaluar numri mbi 160 vetëm te ne që janë paraqitur, por unë besoj se ftesa ka edhe më shumë edhe pse nuk i kanë publikuar të gjitha. Kështu që për ne nuk është diçka e papritur, sepse kjo Gjykatë është vulosur nga deputetët tanë faqezi dhe tash ata i kryejnë detyrat e veta”, ka thënë Haradinaj.
Ndonëse vazhdon të mos e pranojë Gjykatën Speciale, Haradinaj ka thënë se secili pjesëtar i UÇK-së duhet t’i përgjigjet këtij organi.
“Këto ftesa kanë filluar të humbin kontrollin, sepse po ftohen edhe njerëz që nuk kanë qenë fare në UÇK, gjë që na jep të kuptojmë se po mundohen të bëjnë çdo gjë vetëm që ta dëshmojnë atë të cilën e ka thënë Dick Marty në raportin e tij. Prandaj unë në asnjë moment nuk e kam njohur e as nuk do ta njohë Gjykatën, por ne duhet patjetër t’i përgjigjemi asaj, meqë deputetët tanë e votuan pa nevojë”, është shprehur ai.
Ndërkohë i pyetur nëse edhe ai ndihet i rrezikuar nga Specialja, meqë edhe vetë ishte pjesë e UÇK-së, Haradinaj ka thënë se secili pjesëtar i UÇK-së mund të jetë shënjestër e Speciales, duke përfshirë edhe atë, shkruan Zëri.
“Çdo pjesëtar i UÇK-së është target i mundshëm i thirrjeve të Speciales. Për mua nuk është befasi se kë do ta thirrin, porse nuk kanë arsye të më thërrasin e di, por nëse thirrin për luftën që e kam bërë jam i gatshëm t’ju përgjigjem”, ka thënë ai.
