Ani pse nuk arriti të sigurojë ulëse në Kuvendin e Kosovës, Frashër Krasniqi nuk i le anash kritikat ndaj ish-subjektit politik, Vetëvendosje.
Tashmë si pjesë e Partisë Socialdemokrate, Frashër Krasniqi ka thënë se ende pa ardhur plotësisht në pushtet, Vetëvendosje i ka ndërruar katër qëndrime.
Krasniqi tha se VV-ja e quajtën ide valide “Bashkimin Kombëtar” po të ndodhte në vitin 91 por nuk u tha asnjë fjalë në mbrojtje të UÇK-së.
“Bashkimin Kombëtar e quajti ide valide po të ndodhte në vitin 91, ani pse e kërkonte këtë bashkim gjatë gjithë kohës sa ishte në opozitë. Nuk e tha asnjë fjalë në mbrojtje të UÇK-së nga Gjykata Speciale, ani pse vet kishte premtuar që kur të vinte në pushtet do t’i mbronte ata që thirren nga kjo gjykatë”, shtoi ai.
Postimi i tij i plotë:
Ende pa ardhur plotësisht në pushtet, VV i ndërroi 4 qëndrime:
- Isa Mustafa dhe Skender Hyseni nuk konsiderohen më përgjegjës për vdekjen e Astrit Deharit,
- U ankua në supreme kundër vendimit për refuzimin e votave të ardhura nga Serbia – të cilat i quante vota të papranueshme dhe të dirigjuara nga Vuçiqi,
- Bashkimin Kombëtar e quajti ide valide po të ndodhte në vitin 91, ani pse e kërkonte këtë bashkim gjatë gjithë kohës sa ishte në opozitë,
- Nuk e tha asnjë fjalë në mbrojtje të UÇK-së nga Gjykata Speciale, ani pse vet kishte premtuar që kur të vinte në pushtet do t’i mbronte ata që thirren nga kjo gjykatë.
Të gjitha këto ndryshime joparimore kanë një emërues të përbashkët: interesin momental ditor për të ardhur në pushtet pa pengesa, ka shkrua ai. /InLajmi
