Rektori i Universitetit të Prishtinës, Marjan Demaj përmes një telegram ngushëllimi në emër të organeve drejtuese dhe menaxhues, studentëve, stafit akademik dhe administrativ të UP-së, u shprehi ngushëllime familjarëve së të ndjerit, miqve, kolegëve dhe studentëve të tij.
Ai më tutje tha se Vokshi si profesor ka qenë shembullor dhe ka dhënë kontribut të madh ndaj fakultetit të Prishtinës qysh në vitet 1986 e deri më tani.
Demaj përfundoj se kujtimi për Vokshin do jetë i paharruar.
Postimi i tij i plotë në një telegram ngushëllimi:
E respektuara familje Vokshi,
Me pikëllim të thellë e pranuam lajmin që sot u nda nga jeta prof. dr. Afrim Vokshi.
Vokshi ishte inxhinier i ndërtimtarisë dhe profesor universitar. Që nga viti 1969 u bë pjesë e Universitetit të Prishtinës si ligjërues në Fakultetin Teknik, ku mbrojti edhe disertacionin e doktoratës. Në vitin 1986, profesor Vokshi u zgjodh profesor ordinar, ku shërbeu në mësimdhënie e kërkime shkencore për dekada.
UP shquhet me profesorë shembullorë, e njëri ndër ta ishte edhe profesori i ndjerë, Afrim Vokshi. Ai për kolegët paraqet një figurë të akademikut të kompletuar, ndërkaq për studentët ishte një udhërrëfyes e pedagog i shkëlqyer.
Kontributi i tij për fakultetin ishte krucial, duke bërë që personaliteti i tij të mbahet gjallë përherë, e të lartësohet edhe më shumë në vazhdimësi. Ai ishte pjesëmarrës në shumë kongrese, simpoziume e konferenca, si dhe është autor i shumë punimeve shkencore.
Andaj, me lejoni që në emër të organeve drejtuese dhe menaxhuese, studentëve, stafit akademik dhe administrativ të UP-së, tu shpreh ngushëllimet më të sinqerta familjarëve, miqve, kolegëve dhe studentëve të tij.
I paharruar qoftë kujtimi për profesor Vokshin!
Me respekt,
Prof. dr. Marjan Dema – rector
