Gruas më të votuar në Lidhjen Demokratike të Kosovës, Vjosa Osmanit duket se i ka përfunduar misioni i saj si vendimtare në këtë parti, pas zgjedhjeve të 6 tetorit.
Renditja e LDK-së si parti e dytë për nga numri i votave, ka lëkundur edhe pozicionin e kandidates për kryeministre, e cila tani kur po zhvillohen bisedimet për bashkëqeverisje me partinë e parë, Lëvizjen Vetëvendosje ka rënë në heshtje.
E për këtë situatë, njohësit e çështjeve politike kanë dyshime se ajo mund të jetë përdorur nga partia vetëm për të mbledhur vota.
Një mendim të tillë e ka analisti politik Imer Mushkolaj, sipas tij, po të mos ishte kështu ajo do të ishte më e angazhuar në procesin e negociatave mes dy partive politike.
“Unë them se LDK-ja e ka “përdorur” Vjosa Osmanin për mbledhje të votave. Po të ishte ndryshe ajo do të përfshihej në mënyrë aktive në negociatat me VV-në.Tashmë po shohim se në këto negociata është përfshirë kryesisht garda e vjetër e partisë si z.Haziri dhe të tjerët. Të mos harrojmë se zonja Osmani përpos si Kandidate për Kryeministre mban dhe postin e njërës prej nënkryetarëve të LDK-së dhe ajo do të duhej të ishte përfshirë më tepër. Mendoj se Vjosa Osmani do të duhej të ishte më e përfshirë në proces sepse nëse Vjosa Osmani nuk do të ishte kandidate për Kryeministre LDK-ja zor se do ta kishte arritur këtë rezultat. Nëse vazhdon kjo qasje ndaj zonjës Osmani atëherë mund të konstatojmë se ajo është përdor veç si “makinë”për mbledhjen e votave” tha Mushkolaj.
Ndërsa njohësi i çështjeve politike në vend Belul Beqaj thekson se po shihet dominimi i veteranëve të LDK-së karshi Vjosa Osmanit.
Beqaj thotë se Osmani duhet ta kuptojë votën që i dha sovrani dhe të dominojë të gjithë ata që e sollën në pikën kritike LDK-në.
“Dyshimet e vlerësuesve serioz se Vjosa Osmani do të jetë nën survejimin dhe kontrollin e veteranëve dështak të LDK-së, po dalin të vërteta. Por, kjo situatë nuk e amneston heshtjen e Vjosa Osmanit. LDK-ja, rikthimin e saj shumë të rëndësishëm në politikën kosovare e ka krijuar me te e jo me liderin e partisë që për pak nuk e fundosi LDK-në. Fati është se është futur në lojë, për arsye taktike të liderit partiak zgjedhore Vjosa, por fatkeqësia se ajo nuk po e kupton rolin dhe shansin që ia ka dhënë sovrani për të dominuar të gjithë ata që LDK-në, për pak nuk e margjinalizuan. Pavarësisht se kush qëndron pas heshtjes, heshtja i akuzon të gjithë ata që pengojnë rolin më proaktiv të saj që reflekton vullnetin politik të qytetarëve” thekson Beqaj, shkruan Gazeta Blic.
Kujtojmë se Lidhja Demokratike e Kosovës në zgjedhjet e 6 Tetorit mori një numër të konsiderueshëm votash duke u renditur subjekti i dytë politik në vend.
