Ndonëse janë duke vazhduar takimet e grupeve punuese të dy partive që synojnë të qeverisin me vendin, Lëvizjes Vetëvendosje dhe LDK-së, një gjë tashmë është e qartë. Këto dy parti janë dakorduar në përgjysmimin e numrit të qeverive, nga 21 sa janë aktualisht në 12.
Edhe pse një hap i tillë është mirëpritur fillimisht nga opinioni i gjerë, kjo mund të sjellë reduktimin e numrit të shërbyesve civilë në institucionet e Kosovës.
Kandidati për kryeministër Albin Kurti, shpesh është gjendur përballë kësaj pyetje, dhe disi si për të relaksuar punonjësit e institucioneve publike ka deklaruar se nuk do të ketë reduktim të numrit të tyre, por se të njëjtit do të zhvendosen nëpër ministri përkatëse, madje do të kenë edhe më shumë angazhim.
Por, Artan Demhasaj nga “Çohu, ka shprehur skepticizmin nëse shërbyesit civilë mund të kenë komoditetin ‘të flenë dathë’ sa i përket vendeve të tyre të punës.
Ai ka theksuar se si Qeveria e ardhshme nuk ka të drejtë ligjore t’i largojë nga puna, ndërsa ngritja eventuale e ndonjë padie nga ana e punonjësve do t’i kushtonte shumë buxhetit të shtetit.
“Vazhdimisht kam ngrit shqetësim për këtë shkrirjen e ministrive, pasiqë nuk është problem vetëm shkrirja e mistrive, por shqetësim kryesorë është se çfarë do të bëhet me punonjësit që janë aktualisht duke punuar në këto ministri. Këta punëtorë kanë kontrata me ministritë aktuale, prandaj kjo do të jetë një sfidë dhe barrë për qeverinë. Nëse ata largohen nga puna, mund ta padisin qeverinë, dhe si rrjedhojë mund të ketë kosto të lartë financiare”, tha Demhasaj.
Mirëpo, Artan Demhasaj, këtë nuk e sheh si zgjidhje. Demhasaj thotë se edhe transferimi i punonjësve nga një ministri në tjetër do të kishte pasoja negative. Sipas tij, kjo do të rezultonte me një stërngarkim të stafit.
“Edhe nëse barten shërbyesit civilë në një ministri, as kjo nuk më duket opsion i duhur, pasiqë do të ishte një stërngarkim”, është shprehur Demhasaj.
Reduktimin e numrit të ministrive e ka kritikuar edhe instituti EPIK, i cili e konsideron me pasoja negative sa i përket reformave evropiane për vendin.
“Përderisa zvogëlimin e numrit e ministrive e mirëpresim me duar të hapura dhe entuziazëm të papërmbajtur, duhet të nënvizojmë se ndarja e procesit integrues nga Kryeministri do jetë gabim strategjik i cili do të krijojë parakushte për ngadalësim të reformave evropiane”, thuhet në komunikatën e lëshuar të enjten nga EPIK, transmeton Periskopi.
Kujtojmë se numri i të punësuarve në sektorin publik është rreth 82 mijë persona. Paga mesatare në sektorin publik, sipas të dhënave të fundit të Agjencisë së Statistikave të Kosovës, në vitin 2018, ishte 573 euro.
