Sipas një komunikate për media u bë e ditur se drejtori i përgjithshëm i Policisë së Kosovës, z. Rashit Qalaj, është duke qëndruar në Shtetet e Bashkuara të Amerikës për një vizitë zyrtare.
Gjatë qëndrimit në SHBA, Qalaj, mori pjesë në konferencën e IACP-së të mbajtur në Chikago, ku pjesëmarrës ishin edhe një numër i madh i niveleve të larta të shefave të Policisë në mbarë botën, i pranishëm ishte dhe Donald Trump.
“Kjo konferencë e karakterit ndërkombëtar të pranishmëve iu mundëson shkëmbimin e përvojave policore, trajtimin e problemeve dhe fenomeneve nga fusha e rendit dhe e sigurisë, si dhe njohjen me teknologjitë më të reja të cilat aplikohen në fushën e sigurisë, për shërbime më të mira ndaj të gjitha komuniteteve.
Gjatë qëndrimit në SHBA drejtori QALAJ realizoi disa takime të rëndësishme, përfshirë takimin me shefin e INL- Department of State, Bureau of International Narcotics and Law Enforcement Affairs, Principal Deputy Assistant Secretary James A. Walsh, si dhe takim me ushtruesin e detyrës së drejtorit të ICITAP-it z. Greg Ducot.
Drejtori QALAJ përveç tjerash gjatë pjesëmarrjes në këtë konferencë si dhe gjatë realizimit të takimeve rëndësi të veçantë i ka kushtuar çështjes së bashkëpunimit policor ndërkombëtar, luftës kundër terrorizmit dhe radikalizmit të dhunshëm, krimit të organizuar transnacional si dhe llojeve të tjera të krimit.
Kjo konferencë e karakterit policor është një nga konferencat më të mëdha të mbajtura çdo vit në SHBA, ku Policia e Kosovës është mbështetur dhe është përkrahur nga ICITAP-i amerikan, të cilët janë bashkëpjesëmarrës” thuhet në komunikatë. /InLajmi/
