Harmonizimi i programit qeverisës për zhvillimin ekonomik , do të jetë temë diskutimi në takimin e radhës mes grupeve punuese të Lëvizjes Vetëvendosje e Lidhjes Demokratike të Kosovës.
Albulena Haxhiu, e cila është pjesë e grupit punues nga Vetëvendosje ka bërë me dije se sot do të diskutohet për ekonominë, teksa të enjten për drejtësi.
“Siç e kemi bërë të ditur, sot në orën 15, do të takohen grupet punuese. Tema e diskutimit sot do të jetë harmonizimi i programit qeverisës për zhvillimin ekonomik ndërsa të enjten për shtetin e së drejtës”, ka thënë Haxhiu.
Ky është takimi i tretë me radhë që do të ndodh mes LDK-së e VV-së. Për dallim nga takimi i së mërkurës (23 tetor), që u mbajt në selinë e Vetëvendosje, kësaj radhe grupet punues do të takohen në zyrat e Lidhjes Demokratike.
Pas takimit të dytë, Lumir Abdixhiku nga LDK deklaroi se kanë diskutuar për formatin e qeverisë së ardhshme, shkruan Insajderi.
“Takimi i dytë u zhvillua në frymë pozitive në përafrim të qëndrimeve mes dy subjekteve politike. Ne sot dakorduam agjendën e takimeve për dy javët e ardhshme dhe kjo agjendë synon të orientohet drejt temave të rëndësishme të zhvillimit ekonomik, të arsimit, shëndetësisë, rendit dhe ligjit dhe politikës së jashtme. Në veçanti sot kemi diskutuar për formatin e qeverisë së ardhshme, për të 12 ministritë se si do të duken ato. Dhe se si do të fuzionohen në ditët e para të qeverisë. Takimi i ardhshëm mbahet të hënën në orën 15:00 në zyrat e LDK-së dhe çdo tre ditë pas çdo takimi do të ketë takime vijuese ndërmjet dy subjekteve politike”.
