Për një vit e gjysmë 166 të vdekur në aksidente

Sipas shënimeve të Policisë për një vit e nëntë muaj nëpër rrugët e Kosovës kanë vdekur 166 persona nëpër aksidente.

Në vitin 2018 dhe 2019 sipas raporteve përfundimtare të Policisë së Kosovës ndodhën gjithsej 23, 508 aksidente.

Nga këto aksidente të dy viteve të fundit, sipas informacioneve të dhëna për InLajmin nga “zyra informuese e Policisë së Kosovës” vdiqën 166 persona.

“Llojet e aksidenteve, numrin e gjobave si dhe krahasimin e kësaj periudhe kohore me periudhën e njëjtë me vitin e kaluar më së miri e tregon grafika statistikore nga ana e Policisë së Kosovës”.

Statistikat e treguara nga zyra për informim e Policisë së Kosovës janë: Në vitin 2018 11776 aksidente u morën jetën 166 njerëzve. Kurse në vitin 2019 vetëm gjatë periudhës Janar-Shtator 11732 aksidente u morën jetën 76 njerëzve. Gjatë vitit 2018 gjithsej aksidente fatale ishin 69, persona të vdekur gjatë aksidentit 90, aksidente me lëndime 4668, personat e lënduar 9354, aksidente me dëme 7039, ndërsa shqiptimet e tiketave nga ana e Policisë ishin 305863.

Kurse nëntë mujorëshin e vitit 2019, kishte 66 aksidente fatale me 76 persona të vdekur, aksidente me lëndime 4443, personat e lënduar 8625, aksidente me dëme 7223 dhe tiketat e shqiptuara nga ana e Policisë së Kosovës ishin 321690.

Krahasimi i aksidenteve në Kosovë për Janar-Shtator 2018/2019

Më tutje të dhënat që ka siguruar InLajmi, nga zyra informuese tregojnë për aksidentet dhe masat e marra për aksidentet në trafik nga Policia e Kosovës.

“Policia e Kosovës nga fushëveprimi i saj, si në aspektin parandalues edhe atë reaktiv ka punuar në vazhdimësi për një siguri më të madhe në trafikun rrugor. Qëllimi i këtyre angazhimeve policore ka qenë reduktimi i aksidenteve në trafik, në veçanti evitimi i aksidenteve me pasoja fatale në njerëz. Përpjekjet e Policisë së Kosovës janë të fokusuara jo vetëm në aspektin ndëshkues për kundërvajtësit që shkelin rregullat por edhe në nevojën e angazhimit dhe bashkërendimit të aktiviteteve të gjithë mekanizmave tjerë institucional që kanë rol dhe ndikim në vetëdijesimin e pjesëmarrësve në trafik, në veçanti drejtuesit e automjeteve. Policia në kuadër të përgjegjësive të saj ka hartuar planet operative, ka realizuar projektet vetedijësuese në bashkëpunim me ministrinë (MIT), me media dhe me institucione arsimore, gjithashtu ka ndërmarra masa konkrete në terren përmes pikave te kontrollit, patrullimit me automjete civile e tjera”, thonë nga Zyra për Informim e Policisë.

Eksperti i komunikacionit rrugor Dr. Sc. Nol Dedaj për InLajmin tregon se janë pesë faktorë kryesor nga të cilët shkaktohen aksidente.

“Aksidentet e komunikacionit shkaktohen nga 5 faktorë: Faktori njeri (85%), faktori rrugë me (8-10 %), faktori automjet (3-5%), faktori komunikacion në rrugë rreth 1% dhe faktori incident rreth 1%”, shpjegon eksperti.

Përqindja më e madhe e shkaktimit të aksidenteve nga këta pesë faktorë, Dedaj thotë se është sipas standardeve evropiane, por nuk e përjashton mundësin e gjendjes në Kosovë që mund të ndryshojë.

“Te ne duke pasur parasysh nivelin e rrugëve dhe vjetërsinë e automjeteve dhe mbikëqyrjen e tyre (kontrollimin teknik – formal) atëherë thjesht vijmë në përfundim se faktori rrugë dhe faktori automjete përmes elementeve të tyre te ne paraqiten si shkaktarë me një përqindje me te madhe”, thotë Nol Dedaj.

Sipas Dedajt aksidentet nga faktori komunikacion lidhen me mosrespektimin e sinjaleve të ndalimit, përparësisë dhe sinjaleve të semaforëve ka thënë se është kundër pjesëmarrësve në komunikacion që hyjnë në të kuqen- kur e kanë të ndaluar të lëvizin.

Sipas ekspertit automjetet e vjetra janë të rrezikshme kur dalin në trafik sepse janë shkaktari kryesor i aksidenteve. Po ashtu përmendi dhe kujdesin ndaj frenimit dhe ndriçimit tek automjeti.

“Automjetet kur dalin në qarkullim teknikisht jo të rregullt paraqesin rrezik potencial për të shkaktuar aksident, por këtu vlen të ceken dy elementet e faktorit automjete të cilët në 80% të rasteve shkaktojnë aksidente në komunikacion, e këto janë: sistemi i frenimit dhe sistemi i ndriçimit”, shtoi Dedaj.

Eksperti përmendi edhe infrastrukturën rrugore dhe sigurinë si rrezik për shkaqet e aksidenteve.

“Në Kosovë janë zhvilluar shumë projekte të ndërtimit por u mungon projekti i sigurisë andaj mund të them se ky shkak paraqet rrezik potencial për aksidente në komunikacion”, përfundoi ai.

Ndërsa nga faqja zyrtare e Policisë së Kosovës në 24 orëshin e fundit në të gjithë Kosovën nuk ka pasur aksidente fatale, aksidente me të lëndua ishin 18, aksidente pa të landar 22, arrestime 12, në mbajtje 6 dhe 1250 tiketa të shqyrtuara nga Policia si pasojë e mos respektimit të rregullave të komunikacionit. Dona Gashi / InLajmi