Drejtoresha e Klinikës Infektive në QKUK, Lindira Ajazaj-Berisha, është deklaruar para mediave lidhur me gjendjen shëndetësore të zyrtarëve të KQZ-së, të cilët u helmuan nga hapja e zarfeve të votimit.
Dr.Lindira Ajazaj-Berisha tha se sa i përket informatës në këtë klinikë janë të hospitalizuar 11 pacientë, nëntë femra dhe dy meshkuj.
“Gjendja është stabile të gjithë pacientët kanë kujdesin e QKUK-së, Klinikës Infektive dhe për momentin jemi duke i pritur rezultatet e mostrave të cilat janë marrë. Pas marrjes së anamnezës nga këta pacientë disa prej tyre kanë dhënë të dhëna se kanë pasur mundime, dy prej tyre kanë pasur edhe vjellje, disa ndryshime në lëkurë në formë të skuqjes dhe kruarjes, disa prej tyre në formë të një dematiti, e disa probleme me frymëmarrje”, tha ajo.
Më pas ajo shtoi se për momentin nuk mund të jepet kurrfarë diagnoze sa u përket pacientëve pa ardhur rezultatet laboratorike, raporton Indeksonline.
“Sipas Institutit Shëndetit Publik duhet së paku 48 orë të presim. Pacientët do të qëndrojnë në klinikë, duhet të observohen dhe kur ne e dimë se gjendja është për t’i lëshuar në shtëpi, atëherë i lëshojmë. Sa u përket shatazanave dhe sipas gjinekologëve gjendja e nënës dhe fëmijës është e mirë. Në Infektive dje kanë ardhur këto raste kështu që ditëve më herët paraprake nuk kemi pasur. Dje janë pranuar nëntë të parët, më pas edhe një tjetër dhe nga mbrëmja edhe një tjetër”, përfundoi ajo.
