Me ardhjen e stinës së dimrit, shfaqet edhe nevoja e ngrohjes së objekteve të banimit. Mirëpo ajo që mbetet shqetësuese është mënyra e ngrohjes së banorëve, pasi një pjesë e madhe e kryeqytetit nuk është e kyçur në Sistemin e Ngrohjes, Termokos.
Edhe këtë vit përdorimi i thëngjillit është i ndaluar nga Ministria e Mjedisit dhe Planifikimit Hapësinor, sepse konsiderohet si një ndër ndotësit më të mëdhenj të ajrit.
E qytetarët janë të detyruar të zgjedhin alternativa tjera që të sigurojnë ngrohjen. Ata po ankohen se duhet të ngrohen me ngrohëse elektrike pasi që nuk kanë zgjidhje tjetër, por kjo po i dëmton shumë në buxhetin e tyre familjarë, për shkak të faturave të larta që duhet të paguajnë në fund të muajit.
E.B, banore e Prishtinës tregon për InLajmin, se gjatë stinës së dimrit faturat mujore të rrymës janë shumë të larta sepse duhet të ngrohen me ngrohëse elektrike.
“Zakonisht ngrohemi me termo që janë me rrymë, normalisht që kemi vështirësi sepse termot janë të vogla, ndërsa harxhojë shumë, pastaj faturat në fund të muajit janë shumë të larta”, tha E.B
Edhe G.M, banor në kryeqytet, tregon për vështirësitë që ai përballët gjatë stinës së dimrit për shkak të mungesës së ngrohtores së qytetit në lagjen e tij.
“Është shumë vështirë me ja dalë gjatë stinës së dimrit, sepse faturat vetëm për rrymë vinë mbi 50 euro, për shkak që duhet me u ngroh me ngrohëse elektrike”, u shpreh G.M
E disa banorë të tjerë, kanë zgjedhur djegien e drunjve si opsion për tu ngrohur gjatë stinës së dimrit. Pavarësisht se çmimi i tyre edhe këtë vit është i lartë, kjo mënyrë e ngrohjes si duket po iu konvenon më së shumti qytetarëve.
B.K, banor në Prishtinë tregon për InLajmin, se për të, më pak e kushtueshme është ngrohja me drunj, pavarësisht që çmimi është i lartë.
“Zakonisht ngrohemi me djegien e druve, është më pak e kushtueshme për ne, edhe pse çmimi i druve është shumë i larët por kemi më shumë llogari se sa me ngrohëse me rrymë”, tha B.K
Almir Krasniqi, shitës i drunjve, tregon për InLajmin, se interesimi për blerjen kësaj lënde edhe këtë vit është i lartë sikur se në vitet e kaluara.
“Interesimi është i njëjtë si çdo vit, çmimi është 45 euro për metër, sikurse për drunjtë e ahut po ashtu edhe për të bungut”, tha Krasniqi
Mirëpo, Almiri është i shqetësuar për manipulimet që bëhen me drunj nga ana e tregtarëve, ai thotë se për këtë arsye shumë qytetarë zgjedhin mënyrën më të kushtueshme për t’u ngrohur, vetëm që të mos bien pre e këtyre mashtrimeve.
“Shumë dallavere bëhen gjatë shitjes së drunjve, p.sh qytetari i blenë 7 metra drunj, ndërsa shitësi i dërgon vetëm 5, ose i masin me metra të vogla duke manipuluar me qytetarë, normalisht që ata zgjedhin ndonjë formë tjetër për me u ngrohë”, shtoi tutje shitësi.
Lidhur me atë se a është në plan që në një të ardhme të afërt të kyçen në sistemin e ngrohtores së qytetit edhe lagjet e tjera të Prishtinës, InLajmi, ka kontaktuar zëdhënësen e ngrohtores “Termokos”, Aferdita Uka, e cila tha se janë duke vazhduar punimet për zgjerimin e rrjetit të ngrohjes dhe se së shpejti në këtë sistem do të kyçen edhe disa objekte institucionale.
“Punimet, që janë duke u zhvilluar për zgjerimin dhe rehabilitimin e rrjetit të ngrohjes janë duke u zhvilluar në harmoni të plotë me planin dinamik të përcaktuar. Përveç, një pjese të lagjes “Kalabria” në rrjetin e ngrohjes do të kyçen në këtë sezon ngrohës edhe disa objekte institucionale si: kopshti i fëmijëve “Buzëqeshja”, Stacioni i Policisë në lagjen e “Muhaxherëve” , Fakulteti i Arkitekturës si dhe shkolla “Naim Frashëri”, tha zëdhënësja
Uka, tutje shtoi se deri në fund të vitit të ardhshëm në sistem do të kyçen edhe disa objekte tjera të kryeqytetit.
“Projekti pritet të përfundojë nga fundi i vitit të ardhshëm, deri atëherë në rrjetin e ngrohjes do të kyçen edhe disa objekte banesore përreth “Rrugës B”, disa objekte të vjetra në lagjen “Ulpiana” si dhe disa objekte institucionale në “Qendër” u shpreh Uka.
Për lagjet të cilat janë të kyçura në sistemin e ngrohtores së qytetit Termokos, furnizimi me ngrohje fillon nga data 15 tetor dhe përfundon me datën 15 prill. Gentiana Mani, /InLajmi/
