Policia e Kosovës, përmes një komunikate për medie ka kërkuar tek të gjithë pjesmarrësit e trafikut që të kenë kujdes maksimal në trafik, raporton InLajmi.
“ Policia e Kosovës apelon tek të gjithë pjesëmarrësit në trafik për kujdes të shtuar pasi që nga mbrëmë deri sot në mesditë, në tri aksidente të ndara trafiku, kanë humbur jetën pesë persona dhe janë lënduar shtatë të tjerë”, thuhet në njoftimin e Policisë.
Kjo komunikatë vjen pasi në ditën e sotme ka pasur një numër të madh të aksidenteve në vend të cilat përfunduan edhe me fatalitet.
Njoftimi i plotë i Policisë së Kosovës:
“ Policia e Kosovës apelon tek të gjithë pjesëmarrësit në trafik për kujdes të shtuar pasi që nga mbrëmë deri sot në mesditë, në tri aksidente të ndara trafiku, kanë humbur jetën pesë persona dhe janë lënduar shtatë të tjerë”,
Në fshatin Budrigë (rruga Gjilan-Ferizaj), më 04.10.2019, në ora 22:40, në një aksident ku janë përfshirë dy vetura, kanë humbur jetën dy persona dhe dy të tjerë janë lënduar.
Sot, më 05.10.2019, në ora 09:30, në autostradë, konkretisht në km e 36-të Vërmicë-Prishtinë (fshati Peqan Suharekë), ka ndodhur një tjetër aksident ku janë të përfshira dy automjete (një furgon udhëtaresh dhe një kamion). Si pasojë e aksidentit kanë humbur jetën dy persona dhe tre të tjerë janë lënduar.
Po sot, më 05.10.2019, në ora 11:50, në rrugën Lipjan-Shtime, ka ndodhur aksident trafiku, ku janë përfshirë dy vetura, nga aksidenti ka humbur jetën një person dhe dy të tjerë janë lënduar.
