Kandidati për kryeministër nga radhët e Lëvizjes Vetëvendosje, Albin Kurti, ka vizituar të premten Shtëpinë Muze të Pavarësisë në Prishtinë.Ai pas kësaj vizite ka dhënë një deklaratë për media, ku ka theksuar se në vitin 1997 është takuar me ish-presidentin Ibrahim Rugova, dhe sipas tij takimet me të kanë qenë konstruktive, edhe atëherë kur nuk janë pajtuar.
“Filluam ditën me vizitën në kryeqytetin e lëvizjes në shtëpinë e Lidhjes në Prizren, tash jemi këtu tek Muzeu i Pavarësisë, që gjatë viteve të ’90-ta ishte Shoqata e Shkrimtarëve të Kosovës dhe ku e filloi veprimtarinë e tij politike, publike dhe diplomatike presidenti Ibrahim Rugova. Në këtë shtëpi po ashtu me Adem Demaçin në vitet 1998-99 kemi mbajtur mbi 15 konferenca për shtyp si zyre e përfaqësisë së përgjithshme politike e UÇK-së, gjashtë prej të cilave i kam mbajtur unë pa bacën Adem, kur ai ndodhej në udhëtime zyrtare jashtë vendit ose për shkaqe shëndetësore ishte në Lubjanë. Me presidentin Ibrahim Rugova unë jam takuar këtu, në vitin 1997. Takimet tona kanë qenë konstruktive, edhe atëherë kur nuk jemi pajtuar. Unë e vlerësoj për insistimin e tij për pavarësinë e Kosovës dhe lirinë e Kosovës kundër okupimit të Serbisë dhe shtypjes së diskriminimit, shfrytëzimit që bënin administrata serbe mbi shqiptarët në aparteidin e viteve të ’90-ta. Para 30 vjetëve janë disa intervista dhe deklarime të presidentit historik Ibrahim Rugova se pavarësia e Kosovës është kompromis dhe unë besoj se edhe kjo është gjë që duhet vlerësuar”, ka thënë Kurti para gazetarëve.
E pikërisht në këtë vend, Kurti ka thënë se është marrë vendim që të mbahet protesta studentore e 1 tetorit, ndonëse ishte prolonguar që të mbahet me 1 shtator.
“Në këtë vend jemi takuar për të vendosur për protestë. E protesta e prolonguar për 1 shtator u shty me 1 tetor, sepse kështu u kërkua prej nesh mirëpo në Universitetin e Prishtinës, ne arritëm që së bashku me rektorin e ndjerë Ejup Statovcin, ta ngrisim protestën e planifikuar studentore, në mënyrë që të dalin bashkë studentët me profesorët edhe të veçantën e protestës e bënë që nuk ishin studentët kundër profesorëve, por gjithë kundër okupimit serb”, ka thënë ai.
“Në këtë shtëpi që sot quhet muze ka pasur shumë më tepër aktivitet, ka pasur shumë vendime të rëndësishme, që të ketë kaq pak eksponate sot dhe jo vetëm që ka pak, të njëjtën kohë mirëmbajtja mungon e është për të ardhur keq se ata e kanë pasur edhe ministrinë e Kulturës dhe nuk janë kujdesur për këtë shtëpi-muze të veprimtarisë së ish-presidentit Ibrahim Rugova”, ka thënë Kurti.
Ai ka premtuar se nëse vjen në qeveri, kjo shtëpi-muze do të restaurohet. / Epoka e re ,Express
