Rritja e pagave, rritja e pensioneve, investimi në arsim, në shëndetësi e në bujqësi kanë qenë disa prej zotimeve të kandidatëve të subjekteve politike për kryeministër të Kosovës gjatë ditës së djeshme.
Në tubimet e mbajtura të enjten në kuadër të fushatës zgjedhore ata premtuan edhe rritje ekonomike deri në 8 për qind, shkruan sot Gazeta “Zëri”.
Kandidatët e subjekteve politike kanë vazhduar të japin premtime para qytetarëve edhe gjatë së enjtes. Prishtina, Prizreni, Klina, Malisheva, Rahoveci, Gjakova, Dragashi, Istogu, Vushtrria e Ferizaj kanë qenë qendrat në të cilat janë mbajtur tubimet e subjekteve politike në ditën e dytë të fushatës zgjedhore.
Në kuadër të kësaj kandidatët për kryeministër kanë premtuar rritje të pagave, si dhe rritje të pensioneve deri në 80 për qind.
Premtimet e tilla patën zënë vend edhe në zgjedhjet e kaluara (2017), si dhe në proceset e mëhershme elektorale.
Sido që të jetë, dje u premtua edhe ndarja e 1.3 miliard eurove për infrastrukturën publike e për sektorët strategjikë për katër vjetët e ardhshëm, shkruan më tutje Gazeta ‘Zëri’.
Nuk munguan as zotimet për investime në fushën e bujqësisë, me ç’rast në këtë drejtim u premtuan 500 milionë euro.
Gjatë fjalimeve të tyre kandidatët për kryeministër të Republikës së Kosovës përsëritën edhe zotimet e bëra gjatë hapjes së fushatës për luftë ndaj korrupsionit e nepotizmit
