Biznesi i Fatlum Musliut, banor në lagjen Kalabria është dëmtuar si pasojë e punimeve që po bëhen për vendosjes e gypave të ngrohjes nga ndërmarrja Termokos.
Ai tregoi për InLajmin se këto punime përveç që e kanë dëmtuar financiarisht biznesin e tij, po paraqesin edhe rrezik për qytetarët e sidomos për fëmijët.
“Të gjitha bizneset që gjinden në këtë kompleks banesor janë dëmtuar financiarisht si pasojë e këtij punimi. Fqinji përballë meje më shumë e mban lokalin mbyll se sa hapë, pikërisht para lokalit të tij gjendet një vrimë e madhe, madje është rrezik të bijën në të edhe fëmijët”, tha Fatlum Musliu banor i kësaj lagjeje.
Ai tutje shtoi se punimet po zvarriten nga kompania përgjegjëse dhe se nuk po punojnë çdo ditë në to.
“Kohë pas kohe kompania vijnë e bllokojnë rrugën, vendosin një shirit, e hapin një gropë e me punime tjera më nuk vazhdojnë”, u shpreh Musliu.
Për këtë çështje InLajmi, ka kontaktuar edhe zëdhënësen e ngrohtores “Termokos”, Aferdita Uka, e cila pwrmes njw pwrgjigjeje elektronike ka thwnw se se punimet për realizimin e projektit për zgjerimin dhe rehabilitimin e rrjetit të ngrohjes do të zgjasin 18 muaj.
“Kompania e kontraktuar nga Komisioni Evropian tashmë është duke punuar intensivisht për realizimin e zgjerimit të rrjetit të ngrohjes në lagjen “Kalabria”, të cilat pritet që në këtë vit të kyçen për herë të parë në rrjetin tonë të ngrohjes. Nga kjo lagje do të jenë 20 objekte banesore, për të cilat për herë të parë këtë vit do të fillojë furnizimi me ngrohje të mjaftueshme dhe cilësore nga NP “Termokos”, tha Uka.
Zëdhënësja tutje shtoi se sapo të përfundojnë punimet gjendja në rrugë do t’i kthehet normalitetit, sikurse ka qenë më parë.
“Sa u përket punimeve, që janë duke u zhvilluar nëpër rrugët e kësaj lagjeje, në çdo pozicion ku është duke punuar kompania punëkryese, sapo të përfundojnë punimet gjendja do të rikthehet në gjendjen ekzistuese, do të thotë ashtu si ka qenë para fillimit të punimeve”, shtoi Uka.
Për hallin e banorëve të lagjes Kalabria, konkretisht të banesave të “Lesnës”, InLajmi, ka kontaktuar edhe komunën e Prishtinës, ku përmes një prononcimi, Miranda Mullafazliu, zëdhënëse në këtë komunë tha se kjo prishje nuk është në kompetenca të komunës, me këtë çështje duhet të merret Termokosi.
“Kjo prishje nuk është në kompetencë të komunës së Prishtinës, mirëpo i takon Termokosit sepse ata kanë përgjegjësi edhe ata duhet ti riparojnë prishjet”, tha Mullafazliu.
Ndonëse ditët e ftohta po afrohen, këta banorë ende nuk e kanë të sigurt se a do të paisen me ngrohje gjatë stinës së dimrit apo jo./InLajmi/
