Kandidati për deputetet nga koalicioni AAK-PSD, Dardan Molliqaj, në asnjë debat televiziv nuk e lë pa e thumbuar ish partinë e tij Vetëvendosje, që dikur për të ishte gati të sakrifikonte çdo gjë. Ai këtë herë ka thënë se Vetëvendosje duke u ikur debateve është shndërruar në një PDK 2.0.
Molliqaj, në “Debat Plus” me Ermal Pandurin në RTV Dukagjini ka thënë se të aderuarit e ri në Vetëvendosje kanë ardhur për të zhvatur fonde në këtë parti.
“Për nga konceptimi i politikës Vetëvendosje është bërë PDK 2.0. Edhe nga numri i njerëzve që po merr nga PDK-ja edhe nga profilet që po merr nga PDK-ja ky koncept qëndron. Grupet që shkojnë nga PDK në VV janë ata që mendojnë se PDK-ja ka devijuar ideologjikisht nga koncepti majtist leninist e enverist dhe grupi i dytë janë ata që nuk kanë mundur të keqpërdorin e shfrytëzojnë pronën publike e tash mendojnë se VV është treni i radhës ku mund të përfitojnë”.
Kandidati për deputetet nga PSD ka thënë se edhe PDK-ja në vitin 2017 ikte nga studiot televizive dhe u mundoke të përfaqësohet nga disa përfaqësues të shoqërisë civile që formalisht nuk ishin në PDK.
“Të njëjtit që kanë mbrojtur PDK-në në vitin 2017 po e mbrojnë Vetëvendosjen tash”, tha Molliqaj /InLajmi/
