Ditë më parë, në amfiteatrin e RTV Presheva, u organizua akademi perkujtimore me rastin e pesë vjetorit të vdekjes së regjisorit Agron Boriçi. Në kuadër të këtij organizimi u bë promovimi I librit “Hija e Fantazmës”, libër të cilin i ndjeri e la në dorëshkrim.
Agron Boriçi, i cili u nda nga jeta në moshën 60 vjeçare, për katër dekada është marrë aktivisht me veprimtari skenike, si regjisor, skenarist dhe aktor. Ka luajtur shumë role në skenën e teatrit dhe ka inskenuar mbi 30 drama të zhanreve të ndryshme, 2 filma dokumentarë, dhjetra recitale skenike dhe skeçe.
Në vitin 1994, i ndjeri ishte ndër themeluesit e Festivalit tradicional “Ditët e Komedisë Shqiptare”, që tradiconalisht mbahet në Preshevë, dhe autor i dramave; “Aga Ymeri”, “Berberhonja”, “Kalorësi i Apokalipses”, tre pjesë të “Kabare Tv Llaçka”, i librit “Sherri i Preshevës në derë të Stambollit”, etj. Për punën e suksesshme mbi katër dakada në skenën e Teatrit, Boriçi është shpërblyer me mirënjohje dhe çmime të ndryshme.
Me 17 shkurt 2015 nga Presidentja e Kosovës, zonja Atifete Jahjaga, për Kontributin e dhënë në fushën e arsimit dhe kulturës, Agron Boriçi dekorohet me, MEDALJEN PRESIDENCIALE TE MERITAVE./Osman Goranci
