Mijëra protestuar kanë dalë të dielën në rrugët e Hong Kongut. Ata i kanë bërë thirrje presidentit amerikan, Donald Trump, që ta “çlirojë” qytetin e kontrolluar nga Kina.
Policia u përkujdes që ta kontrollonte turmën e protestuesve, të cilët mbanin në duar çadra dhe pankarta të ndryshme.
Ata u dëgjuan duke brohoritur “Luftojmë për liri, qëndrojmë për Hong Kongun” dhe “Rezistoji Pekinit, çliroje Hong Kongun”.
Muajin e kaluar, presidenti amerikan tha se Kina duhet ta zgjidhë problemin e Hong Kongut në mënyrë humane para se të arrijë marrëveshje tregtare me Shtetet e Bashkuara.
Sekretari amerikan i mbrojtjes, Mark Esper, të shtunën kërkoi nga Kina që të sillet me qetësi në Hong Kong, rajon i cili deri në vitin 1997 ishte koloni e Britanisë së Madhe.
Hong Kongu u kthye nën kontrollin e Kinës sipas sistemit “një shtet, dy sisteme”, i cili ia garanton qytetit një nivel të caktuar të autonomisë. Sidoqoftë, shumë banorë frikësohen se Kina ka filluar ta cenojë këtë autonomi, shkruan “Reuters”, transmeton Gazeta Express.
