Deri në fund të kësaj jave partitë politike duhet të vendosin nëse do të bëjnë koalicione apo do të sfidohen të vetëm në zgjedhje.
Deri në këto momente koalicione parazgjedhore kanë nënshkruar AAK-ja me PSD-në dhe Nisma me AKR-në. Edhe këto parti janë në dsiktuime edhe për koalicione të tjera.
Lidhja Demokratike e Kosovës dhe Lëvizja Vetëvendosje janë në bisedime të vazhdueshme për mundësinë që në zgjedhjet që është caktuar që të mbahet me 6 tetor të shkojnë me një listë të përbashkët.
Besnik Bislimi, nënkryetar i Vetëvendosjes, duke folur për takimin që kanë pasur sonte me zyrtarë të lartë të LDK-së ka thënë se kanë edhe tri ditë kohë për të arritur marrëveshjen.
“Si LVV ashtu edhe për LDK ka vetëm një partner strategjik për ndërtimin e qeverisë së ardhshme. Na mbeten edhe tri ditë për të arritur marrëveshjen aq të pritur nga shumica dërrmuese e qytetarëve të vendit”, ka thënë ai.
Të njëjtën e ka thënë edhe Vjosa Osmani, e cila sot nga Kryesia e LDK-së mori nomimin për të qenë kandidate e kësaj partie për kryeministre.
Një burim brenda KQZ-së, i ka thënë portalit Koha.net se ky institucion nesër do të vendosë për planin operativ zgjedhor.
“Mund të jetë 30 gushti. Në rastet e zgjedhjeve të parakohshme KQZ-ja duhet të bëjë një plan operativ, në të cilin duhet të tkurren aktivitetet zgjedhore”, ka thënë ky burim.
