Në kuadër të Projektit,“Arti dhe kultura tek komuniteti etnik rom në Republikën e Kosovës”, prizrenasit dhe mysafirët e tjerë, mbrëmë patën rastin të përjetojnë emocione në një ekspozitë të veçantë të organizuar nga OJQ “Sakuntala”, në Galerinë e artit në Shtëpinë e kulturës, “Xhemajli Berisha” në Prizren. – shkruan InLajmi.
“Zëri i kulturës rome – nga tradita në krijimtari”, ishte tema e kësaj ekspozite që kishte për qëllim, promovimin e gjuhës, artit dhe trashëgimisë kulturore të komunitetit rom, përmes një programi të pasur me aktivitete kulturore dhe artistike. Vëmendje e veçantë në këtë evinement kulturor, iu kushtua promovimit të veprave të përkthyera nga gjuhët tjera në gjuhën rome, punë kjo e nisur nga ndjeri Prof. Ibrahim Elshani, si një përpjekje për të forcuar dhe zhvilluar më tej përdorimin e gjuhës rome në fushën e letërsisë dhe kulturës.
“Një segment i rëndësishëm në këtë ekspozitë ia kemi kushtuar edhe pikturave që pasqyrojnë vlerat historike, shpirtërore dhe kulturore të komunitetit rom, si dhe të punimeve artizanale, të cilat ruajnë mjeshtërinë, kreativitetin dhe trashëgiminë brez pas brezi” – tha për InLajmin Indira Elshani, organizatore kësaj ekspozite. – Qëllimi i këtij aktiviteti kulturor është promovimi dhe ruajtja e vlerave kulturore rome, forcimi i identitetit kulturor, në kuadër të bashkëpunimit me komunitetin shumicë dhe institucionet lokale, duke vendosur kulturën rome në qendër të dialogut kulturor dhe shpirtëror, respektit dhe mirëkuptimit të ndërsjellë.
Të shtojmë se ky evinement që na kujton vlerën e bashkimit ndërmjet diversitetit, duke na ofruar një platformë unike të kulturës, traditës, artit dhe të muzikës rome, ku performoi edhe grupi muzikor nga Gjakova ne krye me Dionis&Dalvin Mamusha, u mbështet nga MKRS-ja dhe zyra e OSBE-së në Prizren. O. Goranci /InLajmi/
