Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit pa votat e opozitës ka votuar Raportin me amendamente të Komisionit Funksional në Projektligjin mbi ndarjet buxhetore për Buxhetin e Republikës së Kosovës, raporton InLajmi.
Sipas deputetëve të opozitës Projektligji për ndarjet buxhetore nuk i plotëson kushtet e qytetarëve dhe si i tillë nuk do të votohet nga ta.
Deputeti i PDK-së, Hajdar Beqa, tha se nëse Qeveria reflekton sa i përket Ligjit të pagave do ta votojnë buxhetin.
“Ne nuk do t’i votojmë këto amendamente dhe është qëndrim i PDK-së, kështu që nëse reflekton Qeveria me Ligjin për paga atëherë do të kemi qëndrim tjetër”, tha ai.
Ndryshe, shefi i grupit parlamentar të AAK-së, Besnik Tahiri, tha se amendamenti i tij në zonën ekonomike të Podujevës është larguar, ndërsa këtë e quajti mashtrim.
“Në amendamentin ku bëhet fjalë për Zonën ekonomike të Podujevës, amendament të cilin unë e kam paraqit e kemi kërkuar buxhetin prej 500 mijë eurosh dhe këtu e shoh se loja dhe mashtrimi që qenka bërë, e që qenkan vendosur vetëm 200 mijë euro dhe tre deputetë të pozitës më thanë se kaloi amendamenti yt. Ky amendament është mashtrim ose mosdije”, tha Tahiri./InLajmi/
