Ministri i Kulturës, Rinisë dhe Sportit, Hajrulla Çeku i ka ndarë Çmimin për Vepër Jetësore “Niketë Dardani”, kompozitorit Rafet Rudi, raporton InLajmi.
Ministri ka ndarë edhe çmime të tjera vjetore për muzikë, ai u shpreh shumë i lumtur që ndanë këto çmime.
“Po e kryejë një pjesë të obligimit që kemi ndaj juve dhe punës së juaj. Është më e pakta që mund të bëjmë ndaj asaj që ju e meritoni. Para gjysmë ore i kam nënshkruar çmimet e vendimin para disa ditësh. Përgjegjësia me vlerësua punën artistike është shumë e madhe, kjo ka qenë përgjegjësi e një jurie kredibile, nuk kisha dashtë me i mbetë kjo një ministri”.
Sami Pirraj, zyrtar i muzikës në Ministri ka komunikuar vlerësimin dhe vendimin e jurisë profesionale.
“Po i shpalosim rezultatet e konkursit për vitin 2020 për vepër jetësore. Çmimi për vepër jetësore është nderuar nga Filarmonia e Kosovës. Kompozitorët që kanë konkurruar i janë nënshtruar një jurie profesionale. Ky konkurs ka mbi një decenie e më shumë që ka filluar të veprojë në ministri. Është krijuar një institucion që ka dhënë rezultate mjaftë të mëdha duke i cytur artistet të krijojnë vepra të mëdha muzikore”.
Ndërsa çmimi për veprën jetësore “Niketë Dardani” i jepet kompozitorit Rafet Rudi, ai mbi gjysmë shekulli është kontribues i muzikës në nivel kombëtar dhe ndërkombëtar.
“Çmimi kombëtar për vepër jetësore “Niketë Dardani” i jepet kompozitorit Rafet Rudi që është kontribuues i jetës muzikore mbi gjysmë shekulli në nivele kombëtare e ndërkombëtare me shumë vepra cilësore. Veprimtaria e profesor Rudit është e larmishme me shtrirje të gjerë të veprave të behatshme”.
Çmime tjera morën edhe kompozitorët Kreshnik Alickaj, Hajrullah Syla, Blendi Kelmendi.
“Falënderoj ministrinë që po vazhdon iniciativën e filluar më herët dhe që ka qenë tërë kohën një stimulat i rëndësishëm për krijimtarinë që vështirë po e gjen vendin në këto ndryshime të mëdha. E di që në faza të ndryshme kompozitori sidomos në kohën e fundit ka nevojë për mbështetje. Kjo muzikë nuk i nënshtrohet rregullave të tregut”. /InLajmi/
