Tensionet në Lindjen e Mesme kanë arritur një tjetër kulm të rrezikshëm, pasi Izraeli ka nisur një ofensivë të gjerë ajrore ndaj Iranit, duke ndërmarrë mbi 100 sulme të koordinuara.
Objektivat kryesore të këtij sulmi ishin qendrat bërthamore strategjike, bazat ushtarake dhe shkencëtarët iranianë që punojnë në sektorin bërthamor, disa prej të cilëve ndodheshin në zona të banuara civile.
Një nga goditjet më të rëndësishme është ajo ndaj qendrës bërthamore të Natanzit, e cila ndodhet në provincën qendrore të Isfahanit — një objekt thelbësor për programin bërthamor të Iranit.
Forcat Mbrojtëse të Izraelit njoftoi se ka “dëmtuar ndjeshëm” objektin e madh të pasurimit bërthamor, sipas zëdhënësit.
“Ne kemi sulmuar këtë objekt nëntokësor dhe infrastrukturën tjetër të rëndësishme në këtë vend”, njofton IDF.
Pamjet filmike të publikuara tregojnë momentin dramatik të goditjes së kësaj qendre gjatë natës, duke shkaktuar një shpërthim të fuqishëm dhe panik në zonën përreth.
Sulmet izraelite janë përqendruar në disa rajone të vendit, përfshirë Shirazin, Tabrizin, Borujerdin dhe vetë Isfahanin. Objektivat përfshijnë fabrika për prodhimin e raketave të Gardës Revolucionare Islamike (IRGC), depo të municioneve, si dhe aeroporte me rëndësi strategjike ushtarake.
Ndërkohë, këtë mëngjes, Agjencia Ndërkombëtare për Energjinë Atomike (IAEA) ka deklaruar se, pavarësisht sulmeve intensive, nuk është regjistruar ndonjë rritje e niveleve të rrezatimit në Natanz apo zonat përreth. Megjithatë, shqetësimet ndërkombëtare për një përshkallëzim të mëtejshëm të konfliktit janë në rritje.
Reagimi i Iranit pritet të jetë i ashpër, ndërsa protestat në qytete të ndryshme po shpërthejnë me thirrje për hakmarrje dhe përgjigje të menjëhershme ndaj Izraelit. Komuniteti ndërkombëtar bën thirrje për qetësi dhe zgjidhje diplomatike për të shmangur një konflikt të hapur rajonal.
