/Ose ballë për ballë me punimet e piktorit Idriz Berisha Xhixhi, në ekspozitën e hapur në Prizren për nder të festave të qershorit/.
Shkruan: Osman Goranci
E veçanta e kësaj ekspozite të pavaruar të piktorit të mirënjohur Idriz Berisha Xhixhi, që dallon nga shumë ekspozita të tjera, që mund t’i hasim në galeri e ndryshme, nuk është vetëm titulli, “DRITARET E FËMIJËRISË, YLLËSI E LARGËT NË ART”, por edhe vetë ambienti ekspozues, si edhe pikturat e ekspozuara në Galerinë e Artit, të Shtëpisë së cultures “Xhemajli Berisha në Prizren.
Janë ekspozuar 35 punime artistike që shfaqin një stil të veçantë, të përjetimeve dhe të koncepteve të botës së brendshme të autorit Xhixhi, në teknikën akril në pëlhurë, të punuara gjatë viteve të fundit. Kështu, një histori, një jetë që ende trumbeton në mozaikun e artit pamor, në pëlhurën e bardhë, piktori e bënë më konceptuale, më të abstrahuar, me anë të shumë nuancave të ngjyrave të ngopura mirë, të kërkuara deri tek përsosshmëria e tyre, e ku më së shumti dominojnë ngjyra e bardhë, e gjelbër, e kuqe, etj.
Bota dhe shpirti i pasur imagjinativ i artistit gjallëron me ngjyra e forma të ndezura si vet jeta ekzistenciale. Këto ngjyra ose nuanca edhe pse në shikim të parë, duken të përafërta njëra me tjetrën, janë të ndryshme e që shprehin një coloritë të mrekullueshëm në pëlhurë, nga bota e brendshme dhe ajo e jashtme e piktorit, i cili me mjeshtri i çaset formës dhe ngjyrës me kulturën e lartë të artit pamor.
Pos kompozicioneve të krijuara me lëvizjet magjike të piktorit, kjo ekspozitë si tërësi po edhe çdo pikturë; veç e veç, na drejton tek një mesazh i fortë, por edhe i bukur njerëzor, emancipues dhe përmbajtësor. Në disa piktura të Xhixhit, hasim edhe tek trimat, dijetarët, humanistët dhe patriotët e kombit.
Në fund të shtojmë se piktori Idriz Berisha – Xhixhi, nga Dobërdoli i Klinës, me pikturat e tija është prezantuar në disa qytete të Kosovës, pastaj në Shqipëri, Mal të Zi, Zvicërr, Gjermani, Francë, Itali, Belgjikë, etj.
Është Laureat i shumë Çmimeve nga lëmi I artit pamor, kurse në vitin 2020, nga Presidenti i Kosovës Hashim Thaçi, dekorohet me URDHRI I LIRISË për kontribut dhënë lirisë së Kosovës./InLajmi/
