Presidenti serb Aleksandar Vuçiq ka thënë se ka folur me zyrtarët europianë për “gjendjen aktuale” të serbëve në Kosovë.
Ai vazhdoi retorikën e zakonshme se në Kosovë ka “sulme të përditshme” kundër serbëve.
“Gjërat po ndryshojnë ngadalë por me siguri këtu në Bashkimin Evropian. Njerëzit po shohin gjithnjë e më shumë se cilët janë ata që në thelb po shkaktojnë trazira dhe që nuk duan të krijojnë paqe të qëndrueshme dhe të arrijnë zgjidhje kompromisi”.
Deri në çfarë mase BE-ja tani është e bindur se mund të kontribuojë në normalizimin e marrëdhënieve ndërmjet Beogradit dhe Prishtinës, është pyetur ndër të tjera Vuçiq dhe në përgjigje ai ka pretenduar se ai qëndron për “dialog”, raporton gazeta Express.
“Është shumë e vështirë për ne me sulmet e përditshme ndaj popullit serb në Kosovë. Por dialogu është gjithmonë zgjidhja e vetme dhe kjo është e rëndësishme për ne. Kam biseduar me ta [zyrtarët e BE-së] dhe i kam informuar për gjendjen aktuale. Njerëzit e dinë, shohin, janë të vetëdijshëm. Ne do të shohim”.
‘Situata për popullin serb në Kosovë nuk është e lehtë”, pretendoi ai.
