Instituti Demokratik i Kosovës (KDI) ka reaguar ndaj situatës së krijuar në Kuvendin e Kosovës, duke e cilësuar procesin e përsëritur të seancave çdo 48 orë si një cikël absurd pa reflektim politik dhe pa rezultat konkret.
Sipas KDI-së, mungesa e një marrëveshjeje serioze politike dhe përsëritja e kandidaturës së njëjtë për postin e Kryetarit të Kuvendit, e ka kthyer këtë proces kushtetues në një formalitet të zbrazët.
“Kuvendi nuk mund të funksionojë nëse Rregullorja e tij përdoret si justifikim për të mbajtur një status-quo të paarsyeshme. Rregullorja ka vlerë vetëm nëse zbatohet në frymën e saj, atë të funksionalitetit parlamentar”, thuhet në reagimin e KDI-së.
Instituti thekson se në rrethanat aktuale, problemi nuk është më teknik, por thellësisht politik dhe kërkon adresim në atë nivel.
Në këtë kontekst, KDI i bën thirrje Presidentes së Republikës që të ndërmarrë hapa konkretë duke ftuar liderët e partive politike parlamentare në një takim të përbashkët për të diskutuar zgjidhje të mundshme për tejkalimin e bllokadës institucionale, Telegrafi.com
“Presidentja, sipas Kushtetutës, ka përgjegjësi të garantojë funksionimin kushtetues të institucioneve. Në një situatë kur institucioni më i lartë përfaqësues është i paralizuar, angazhimi i saj nuk është vetëm i justifikuar, por i domosdoshëm”, përfundon reagimi i KDI-së.
