Fotoreporterja palestineze Fatima Hassouna, e cila u vra së bashku me dhjetë anëtarë të familjes së saj në një sulm ajror izraelit mbi shtëpinë e saj në veri të Rripit të Gazës, është protagoniste e një dokumentari që do të shfaqet në Festivalin e Filmit në Kanë muajin e ardhshëm.
Diplomuar në Shkollën Universitare të Shkencave të Aplikuara në Gaza, Fatima nuk ishte vetëm një fotografe – ajo ishte një dëshmitare vizuale e realitetit gjithnjë e më të egër të përditshmërisë. Disa orë përpara se të vritej, ajo postoi një fotografi të perëndimit të diellit nga ballkoni i saj, duke shkruar: “Ky është perëndimi i parë pas një kohe të gjatë”, shkruan theguardian.
“Sa i përket vdekjes së pashmangshme, nëse vdes, dua një vdekje të zhurmshme. Nuk dua të jem pjesë e lajmeve të shkurtra, apo një numër në mesin e turmës. Dua një vdekje për të cilën dëgjon bota, një gjurmë që zgjat përgjithmonë dhe imazhe të pavdekshme që as koha, as vendi nuk mund t’i varrosin,” shkroi ajo në një postim pak para se të vritej.
Një ditë përpara vrasjes së saj, Shoqata për Kinematografinë e Pavarur për Shpërndarje (ACID) njoftoi se dokumentari “Vendose shpirtin në pëllëmbën tënde dhe ec”, nga regjisorja iraniane në mërgim Sedeiph Farsi, është përzgjedhur për Festivalin e Filmit në Kanë muajin e ardhshëm.
Fatima është figura qendrore e filmit dhe përzgjedhja e saj mund të kishte qenë një pikë kthese në karrierën e saj, një mundësi për ta ndarë vizionin e saj me botën.
Në një intervistë për të përditshmen franceze Le Monde, regjisorja iraniane e përshkroi Fatimën me fjalë prekëse, duke thënë se “ajo ishte si dielli”.
“Ajo e ndiqte luftën në Gaza, dhe herë pas here bashkëpunonte me mediat duke u dërguar fotografi dhe video. Çdo ditë më dërgonte fotografi, mesazhe të shkruara dhe regjistrime audio. Çdo mëngjes zgjohesha dhe pyesja veten nëse ajo ishte ende gjallë,” tregoi ajo, transmeton Telegrafi.com
Që nga fillimi i luftës izraelite kundër Gazës, Federata Ndërkombëtare e Gazetarëve (IFJ) vlerëson se të paktën 157 gazetarë dhe punonjës mediatikë janë vrarë, ndërsa raporte të tjera sugjerojnë se numri real mund të ketë kaluar 200.
