Lidhja Demokratike e Kosovës thotë se gjatë 3 viteve të fundit, rritja mesatare ekonomike në vend ka qenë vetëm 3.6%.
Përmes një postimi në Facebook, LDK ka shkruar se pushteti për ta bërë veten të dukët më mirë, thotë se rritja mesatare ekonomike ka qenë 6.2% në 3 vjet qeverisje, meqë po e llogaritë edhe rritjen në vitin post-pandemik.
“Natyrshëm, çdo vit krahasuar me mbylljen totale e kolapsin ekonomik del rritje. Sepse gjatë mbylljes totale e krizës historike siç ishte ajo e pandemisë kishte rënie të thellë e të paprecedentë ekonomike. Krahasimi me pandeminë është mashtrim. Në 10 vitet paraprake, rritja mesatare ekonomike ishte 4.7%. Kjo Qeveri, nuk po arrin të mbërrijë as mesataren e 10 viteve të fundit. Me këtë trend, Kosovës do t’i duhen 40 vite për të arritur Kroacinë”, thuhet në reagimin e LDK-së
Ndër të tjerash, LDK thotë se arsyeja për një rritje jo të mjaftueshme ekonomike, është mungesa e investimeve kapitale, shkruan Teve1.
“Gjersa, Qeveria në këto 3 vite ka ndarë 811 milionë euro para si ndihmë. Pa investime e projekte kapitale, nuk mund të ketë zhvillim. Propaganda nuk e bën ekonominë. Fundja, mirëqenia e zhvillimi s’mund të fshihen sepse ato i ndjenjë qytetarët tanë në çdo hap të tyre”, thuhet tutje në reagimin e tyre.
