Të premten më 2 shkurt 2024 ka vdekur në moshën 70 vjeçare profesori kosovar, Kadri Metaj.
Metaj ka qenë profesor në Fakultetin Filozofik të Universitetit të Prishtinës.
Metaj kishte lindur në fshatin Kaliçan të Istogut në vitin 1954 dhe shkollimin e mesëm e kishte përfunduar në Istog. Studimet në drejtimin filozofi-sociologji i kishte përfunduar në Fakultetin Filozofik të Universitetit të Prishtinës në vitin 1997.
Sipas biografisë së tij të botuar në “Fjalorin Enciklopedik të Kosovës” të Akademisë së Shkencave dhe të Arteve të Kosovës, Metaj, magjistraturën e kishte mbaruar në Universitetin e Sarajevës.
Në vitin shkollor 1981/1982 Metaj kishte shkuar për specializim në Universitetin e Sorbonës, Paris IV në Francë.
“Në vitin 1987 doktoroi në Universitetin e Prishtinës. Në vitin 1979 zgjidhet asistent në degën filozofi-sociologji, kurse prej vitit 1999 deri në pensionim ishte profesor i rregullt në Departamentin e Filozofisë, ku ligjëroi lëndët nga fushat e filozofisë”, shkruhet në biografi.
Metaj ka ligjëruar gjithashtu edhe në Universitetin e Evropës Juglindore në Tetovë, në Universitetin e Shkupit dhe në Universitetin e Tetovës, shkruan GazetaExpress.
Veprat e tij që veçohen janë “Teoria estetike e Gjergj Llukaçit” botuar më 1990, “Filozofia politike” më 2003. Po ashtu përktheu disa vepra nga fusha e filozofisë dhe e estetikës.
