Ministria e Industrisë, Ndërmarrësisë dhe Tregtisë të mërkurën prezantpoi Strategjinë për Zhvillim Industrial dhe Mbështetje të Bizneseve 2030, ku u diskutua rritja e ekonomisë së Kosovës, raporton InLajmi.
Kryeministri Albin Kurti, gjatë fjalës së tij, ndër të tjera tha se si qeveri kanë në plan një industri më të integruar globalisht dhe që të jetë në gjendje të krijojë rritje të punësimit.
Gjithashtu ai përmendi edhe politikat zhvillimore duke përmendur ndihmën për shumë biznese të cilat kanë përfituar kredi për mbarvajtjen e aktivitetit të tyre.
“Vizioni ynë i politikës industriale është ai i një industrie më e integruar globalisht dhe që është në gjendje të prodhojë produkte me vlerë të shtuar dhe të ofrojë punësim. Politikat tona zhvillimore po e rrisin ekonominë e vendit dhe po e mbështesim si asnjëherë më parë qytetarët. Gjatë këtij viti i industria e prodhuesve është rritur, Qeveria ka mbështetur Fondin për Garanci Kreditore me 22.6 milionë euro, ku janë lëshuar 705 kredi për 838 biznese. Nga këto biznese, 12 për qind kanë pronare gra. Ndërsa sa i përket shpërndarjeve të kredive 58 për qind janë prodhues me potencial eksporti të cilat kanë shtuar edhe 1 200 vende pune dhe kanë kontribuar me një rritje të qarkullimit vjetor prej 28 milionë euro” tha Kurti.
Më tutje kryeministri u shpreh se është rritur niveli i punësimit në sektorin privat. Ndërkohë rritjen ekonomike dhe të të hyrave e kanë ndjerë edhe qytetarët teksa vitin e ardhshëm parashikohet që produkti bruto vendor të ketë shifër 2 shifrore milardëshe. Kryeministri gjithashtu shprehu zotimin e qeverisë për të krijuar një mjedis sa më të përshtatshëm për të bërë biznes.
“Nivelin e punësimit në sektorin privat e rritëm. Rritjen ekonomike dhe të hyrave e kemi shpërndarë tek qytetarët dhe nuk e kemi mbajtur për shtetin. Bizneset na janë falënderuar për çmimet e përballueshme të energjisë elektrike që kanë pas gjatë krizës. Viti ardhshëm është i pari kur bruto produkti vendor do të ketë shifër dyshifrore miliardësh. Nuk është rastësi se ekonomia është më e fortë si asnjëherë më parë pavarësisht barrierave. Si qeveri jemi të përkushtuar për krijimin e një mjedisi të të bërit biznes, që do e bëjë Republikën tonë më konkurruese”, tha tutje Kurti.
Ndërkohë, ministrja Rozeta Hajdari u shpreh se mbështetja e prodhuesve vendor është prioritet i Qeverisë, kjo e dëshmuar edhe nga Raporti i Progresit të Komisionit Evropian.
“Mbështetja e prodhuesve vendor, promovimin dhe përkrahjen investive u dëshmua edhe përmes Raportit të Progresit e i cili thekson se Republika e Kosovës ka shënuar progres të dukshëm në këtë drejtim, në veçanti në kornizën legjislative”, tha ministrja.
Në konferencën e zhvilluar u diskutua rreth gjendjes aktuale të sektorit privat në Kosovë si edhe pritshmërive për vitet në vijim. /InLajmi/
