10 persona kanë vdekur nga stuhitë e borës në Ukrainë, tha ministri i Brendshëm i Ukrainës, Ihor Klymenko, më 28 nëntor, pasi erërat e fuqishme dhe stuhitë po godasin këtë shtet që nga dita e diel, duke shkaktuar ndërprerje të energjisë elektrike dhe duke bllokuar rrugët.
Jugu i Ukrainës është goditur më së keqi, veçmas rajoni i Odesës në Detin e Zi.
“Si pasojë e përkeqësimit të kushteve të motit, dhjetë persona kanë vdekur në rajonin e Odesës, Harkivit, Mikolajivit dhe Kievit”, shkroi Klymenko në Telegram.
“23 persona janë lënduar, përfshirë 2 fëmijë”, shtoi ai.
Ekipet emergjente duke nxjerr nga dëbora një makinë të bllokuar në rajonin e Odesës.
Në total, 411 vendbanime në 11 rajone ukrainase kanë mbetur pa energji elektrike dhe mbi 1.500 makina janë larguar nga rrugët, pasi ishin bllokuar, tha Klymenko, shkruan REL.
Oleh Kiper, guvernator i rajonit të Odesës, ku 5 persona kanë vdekur si pasojë e motit të lig, tha se pothuajse 2.500 persona janë shpëtuar pasi ishin bllokuar nga bora.