Kryeministri Edi Rama, në konferencë me gazetarët, komentoi mospjesëmarrjen e kryeministrit të Kosovës në takimin informal, i cili u mbajt sot në Tiranë. Ai tha se nuk ka asnjë interes ta komentojë mungesën e Albin Kurtit, ndërsa shtoi se ftesa ishte e hapur për të gjithë dhe kush e pa të arsyeshme zgjodhi të ishte prezent.
“Nuk shoh asnjë interes, sepse ishin të gjithë të ftuar edhe kush deshi erdhi, kush nuk mundi nuk erdhi”, tha Rama.
Shefi i qeverisë u pyet se çfarë përmban Plani i Ri i mbështetjes financiare dhe ekonomike të BE-së për Ballkanin Perëndimor. Ai tha se nuk mund të flitet ende për gjëra konkrete pasi ky plan është ende në diskutim
Sipas Ramës, Ballkani Perëndimor duhet parë si një rajon i tërë, pavarësisht se disa prej vendeve ndodhen në faza të ndryshme, sa i takon integrimit evropian, shkruan ABC Neës
“Nuk mund të flasim akoma për gjëra konkrete, sepse ky plan është në diskutim. Nuk e di a e keni ndjekur, Ursula von der Leyen, e cila në Bratislavë dha një mesazh të qartë për objektivat e këtij plani, ndërkohë jemi shumë herët për të diskutuar se sa dhe pse një vend ose një vend tjetër do të marrë dhe përftiojë. Ajo që është e rëndësishme është që ta shikojmë rajonin si një i tërë, sepse kështu na sheh BE”, tha ai.
